高貴紮
無線天氣妹黃婉曼跳出香港，跳到班宅男心都離埋，不過最近有傳話無線新聞部覺得佢太高調，所以有意將佢調走，嚇到FBI 啦啦聲開電視睇吓啦，好在天氣妹仲喺到，仲轉埋新形象喎。黃婉曼同FBI 好鎮定話：「冇喎！冇高層同我講過嘢喎！」
天氣妹咁有經濟效益，有線新聞台亦即時有樣學樣，不過唔係搞天氣而係搞出位體育報道。話說上星期三（4 日）FBI 悶悶哋㩒過有線睇吓新聞，竟然見到夜晚11 點時段嘅「體育Extra 」主播陳焜傑竟然扮大哨，之後又扮即時同碧咸做訪問，用廣東話歪歪哋音講：「行（咸）哥，你為AC 賞（上）陣嘅梗（感）覺係典（點）樣呢？」播體育新聞都搞成咁，新聞系班學生應該要搵詹瑞文補吓課，詹sir 你發啦！
大曲髮
純真直
天氣妹不單冇俾人飛，仲要經常轉look ，髮型一時拉直，一時又紮起，總之keep 住新鮮感保持收視，黃婉曼就有得撈啦。
有線體育新聞主播陳焜傑扮同碧咸傾偈，仲要哨起棚牙扮朗拿度，目的只係想講朗拿度負傷都繼續踢波，勁騎呢。新聞娛樂化，似乎係大勢所趨。
