陳志雲:雲 鍾欣桐:嬌
雲:咁你而家出嚟面對群眾,都投入番工作?嬌:嗯。雲:你接第一份工作係咩?嬌:係一個牛仔褲廣告,已經拍咗。嚟緊會去其他地方宣傳。雲:心情係點?嬌:都緊張。因為會喺香港、台灣,其他哋方度有Press Con (記招)。雲:即係要面對群眾?嬌:係呀,要面對記者,其實我都幾驚面對記者。雲:驚咩?嬌:可能大家會一路以嚟覺得我冇乜嘢講,成日黑面,其實可能對我嘅感覺已經係定咗位,再會經過Press Con 同埋好多嘅抨擊,咁始終我都會覺得一道牆喺度咋。其實我冇諗過逃避,我好想大家相處得好啲,但大家都真係驚,因為始終佢哋會問我啲好尖銳呀,或者我想像唔到嘅嘢。雲:除咗廣告之外,仲有乜嘢計劃?電影你公司會唔會為你安排?嬌:而家揀劇本,但未決定。雲:最心儀係拍邊類電影?嬌:我其實乜類型電影,我都想試,因為之前戲路角色太蜻蜓點水,唔夠深入。譬如拍愛情,我冇拍kiss 戲,如果一對情侶係冇kiss 嘅,或者冇攬嘅,我覺得冇過種愛情嘅感覺。我希望有角色係可以深層一啲,但我唔介意拍一啲扮瘋婦呀,我都想嘗試。
公司叫繼續扮學生
雲:出面有講話公司傾緊同劉德華合作,你有冇聽過?嬌:呢個公司冇同我講過。雲:想唔想同佢合作?嬌:希望,我好鍾意華仔。雲:你係咪鍾意做打女?嬌:之前係真係好鍾意,因為我覺得係對我嚟講係一條路,但係畢竟而家都28歲,有啲難。雲:你拍電影都唔少,咁多部,最鍾意邊一部?嬌:最鍾意係《精武家庭》同《公主復仇記》。雲:《公主復仇記》應該係04年,套戲諗番轉頭個內容同現實生活嘅你好相似喎?嬌:初時接呢部戲嘅時候,都驚。雲:睇見個劇情,點解咁似嘅?嬌:驚㗎,咁都接咗,就拍咋。雲:睇到呢個劇本,諗番自己情況,係咪因為咁對呢部戲特別深刻印象?嬌:都深刻。雲:原來吳彥祖呢個角色都同好多女仔拍緊拖,你有冇諗番自己嘅情形,Edison 都會唔會係咁?當時有冇諗過,有冇問過Edison ?嬌:我有問過,佢話冇,咁我信佢冇。雲:唱歌方面,會唔會錄歌?再大展拳腳?嬌:我諗首先會喺廣告同電影方面發展先,唱歌真係要慢慢再試。雲:如果再唱嘅話,係自己發展定同阿Sa 用Twins 組合嚟發展?嬌:我當然想Twins 啦,但係暫時都未有安排我喺唱歌方面。雲:我冇記錯你05年,24歲到時喺台灣出國語碟,係《明愛暗戀補習社》,仍然係學生打扮,其實你覺唔覺得唔好啦,都咁大個?嬌:有呀,即係可唔可以唔好再扮學生,但過段時間都仲OK 嘅,即係同期嘅同學都係大學啫,都OK 嘅,再過多幾年真係唔好咋。雲:有冇同公司反映過,你唔好再叫我再做學生?嬌:有呀,我可唔可以唔好扮學生?話我覺得已經老咗。雲:公司點講?嬌:唔,都要扮,繼續扮。雲:咁你同阿Sa 大家咁好,乜都傾,會唔會有啲感情事嘅時候,識咗邊個男仔,大家都會講吓啲密偈。
嬌:都會㗎。雲:呢個鍾唔鍾意得過呢,呢個好唔好呢,咁有冇?嬌:咁又冇徵詢意見嘅,因為始終我鍾意過個人,你唔鍾意,我都係照鍾意㗎啦,係呀!冇話咩意見,只不過係分享,係呀。雲:佢有冇啲話,喂,阿嬌,呢個唔掂㗎,你冇話鍾意,佢有冇提過呢啲意見畀你㗎?嬌:No ,佢話佢又唔好喎,我唔鍾意佢。雲:但你都唔聽嘅?嬌:嗯,到真係你好深,真係你好鍾意嘅時候,邊個講都唔會聽。
阿Sa 曾明踩陳冠希
雲:咁佢有冇叫過你,陳冠希唔好呀?嬌:都有。雲:但你都冇聽,有冇試過同阿Sa 爭男朋友呀?嬌:冇呀,因為我同佢taste 完全唔一樣,係呀!雲:咁有冇試過有啲男仔追唔到阿Sa ,或者追唔到你,追另外一個?嬌:冇。雲:你咁肯定?嬌:咁我唔知,佢冇講。雲:方力申過時好似話追唔到阿Sa 所以追你?嬌:梗唔係,佢好似冇追過阿Sa ,好似冇呀,真係。佢哋係朋友,好朋友。雲:幾肯定,好有自信?嬌:係呀。雲:你係咪好容易鍾意一個男仔嘅人嚟?嬌:有好感咋,咁到你考慮即想唔想同呢個人一齊嘅時候,你會真係切切實實去諗實在啲嘅嘢咋,即係有冇將來呀,或者即佢負唔負擔到呢個責任,咁咋。唔係即人哋擔張凳畀我,我就覺得佢係好人咋,係呀。雲:但會唔會有好感,對你好就有好感?跟住真係再進一步,就諗實際問題喇?嬌:係喇,就會開始睇下呢個人係咪真係好人雲:Juno (麥浚龍)呢,佢好支持你?形容你係一個好好好好好朋友,你對佢有冇好感呀?嬌:佢係一個好人咋。雲:阿嬌你有冇諗自己幾時會結婚?嬌:有諗過咋。雲:拍戲要投入感情?會唔會令你好多時都投入同個男演員戲假情真咁樣?嬌:好少有感情戲,但做朋友咋。每一部戲拍完,我都真係交到啲朋友,幾好。雲:Juno 會唔會係最近交嘅一個好朋友?佢同你幾時合作過?嬌:《破事兒》嘅時候,之前已經識。雲:佢好支持你,發生咁多事之後。嬌:係呀。雲:佢形容你係一個好好好好好好好朋友。嬌:係咪真係有咁多個好字呀。雲:我又冇數過有幾多個好字呀。嬌:真係唔知呀。
不排除情歸Juno
雲:你覺得Juno 點?嬌:好有義氣,由頭到尾都好支持。雲:你對佢有冇好感?嬌:佢係一個好人咋。有好多人會覺得佢好似借我上位,我又唔覺得係咋,因為我覺得冇必要。雲:佢經濟上有冇支持你呀,你呢一年冇入息?嬌:冇呀,我冇問過任何人借錢呀。雲:你夠錢用呀?嬌:OK ,我唔鍾意問人借錢咋。雲:咁其實你覺得同Juno 有冇發展可能?嬌:呀,我覺得呢啲嘢,遲吓都可以諗嘅,但唔係而家嘅時候。雲:但而家你同佢都有交往嘅?仲係好好朋友嚟嘅?嬌:係朋友,好好嘅朋友。雲:阿嬌你有冇諗自己幾時會結婚呀?嬌:即我以前從來都冇諗過要結婚㗎,但呢一年里面我突然間即係,呀,有諗過咋,呀,即會諗希望搵到一個可以包容我呀,即可以照顧到我嘅人,咁結咗婚算喇,我唔想再面對咁多,咁大嘅壓力或者問題咋,但真係搵唔到。雲:如果呢一年有人同你提出話我娶你呀,你差唔多可以話佢只要包容到我,咁你都肯嫁。嬌:咁又未必,咁我都要鍾意先得㗎。雲:咁你鍾意邊一類嘅男仔呢?嬌:有,有大志咋,同埋最緊要積極咁樣做嘢,我唔鍾意一啲好小家呀,或者好斤斤計較嘅人咋,我唔鍾意,鍾意一啲man 啲呀,有志氣啲嘅人。
「冇問題唔可以解決」
雲:同你傾到呢度呢,問你最後一條問題,你而家預備全身投入娛樂圈嘅工作,又再次發力,萬一觀眾仍然唔係太接受你,你會點呢?有乜打算呢?會唔會放棄呢?嬌:我諗我唔會放棄咋,因為,其實我知道嚟緊條路係好難行,但我支持到呢一刻,我唔會咁輕易放棄咋。身邊好多人支持我,如果我咁輕易放棄嘅話,我會覺得好對佢哋唔住咋,同埋,即係,絕處逢生咋,我覺得冇一個問題係唔可以解決嘅。我覺得就算其他嘅人有乜問題嘅話,身邊好多嘅人都可以幫佢哋解決咗個問題,同埋好多人係,真係好關心咋。所以我為咗一啲錫我嘅人我唔會咁容易放棄咋。雲:我都相信嘅,我信天無絕人之路,只要我哋努力去行每一步呢,一定會搵到新嘅生機,咁我喺度衷心祝願阿嬌有好好嘅前程,同埋最緊要遇到乜嘢困難,你一定要勇敢去面對,祝你有個愉快嘅人生,開展你新嘅一頁。嬌:Thank you 。全文完
![鍾欣桐《志雲飯局》訪問實錄(三)--「希望搵個人結婚」圖片1](http://static.apple.nextmedia.com/images/apple-photos/apple/20090307/large/07ec2p3newa.jpg)
阿嬌覺得Juno 很有義氣,不排除與他發展。 資料圖片
http://appledaily.atnext. ... art_id=12463238