陳志雲：雲 鍾欣桐：嬌
雲：咁你咁唔願意，係乜嘢令你決定都要行出嚟面對群眾？點解而家要行出嚟講番呢件事？嬌：覺得係Charlene （蔡卓妍），我自己一個人犯錯，我哋係一個組合，唔理件事，要顧及Charlene 。出嚟對Charlene 有個交代。雖然出嚟Charlene 都會俾人追問，但我要出嚟面對大家，話畀大家聽我錯咗。雲：阿Sa 本身有冇希望你開呢個記者會？嬌：佢擔心，好擔心，唔知我出嚟承唔承受到壓力，冇話想唔想，只要我OK ，佢會支持。
記者會前食鎮靜劑
雲：書入邊講過，開記者會之前緊張到要食咗鎮靜劑，係咪真係有咁嘅事？嬌：我食咗半粒鎮靜劑，同Mani 一人半粒，壓力好大，過個心臟就嚟爆炸，如果我唔食鎮靜劑，出到嚟會崩潰。雲：喺記者會說話係你自己嘅說話，定係公司幫你諗一齊點講？嬌：大家有諗點講，但係出嚟我點講大家都控制唔到，天真同傻係我意願（眼有淚光）。我覺得兩個人拍拖邊個冇試過天真同埋傻先，愛情好蒙蔽咗一個人，我天真同傻絕對冇話因為影咗呢啲相，係因為呢段感情。雲：你開個記者會主要想承認自己嘅錯同道歉，抑或係對公司交代？嬌：覺得係對大家一個交代，我係有抱歉咋，呢個係我犯咗嘅錯。雲：你覺得你嘅錯喺邊？嬌：錯係唔應該影呢啲相，我係怪自己咋。雲：當時記者會之後覺得你冇誠意道歉，天真同傻呢句說話唔岩聽，你點睇呢啲反應？嬌：一個咁簡短嘅記者會冇辦法，解釋唔到成段感情前後所有來龍去脈，講乜都會quote 一句針住我嚟講，我如果唔話天真同傻，話好蠢人哋都會咁寫。雲：覺唔覺自己蠢？嬌：邊個冇蠢過，可能有啲人好叻，我對愛情係蠢。雲：出席完賑災活動後收到好多投訴，劣評如潮，收到嘅投訴係全年投訴嘅四分一。有冇諗過娛樂圈唔再適合你，唔可以再喺娛樂圈立足？
嬌：我覺得我可以為咗啲災民出一分力，我已經盡咗力，大家要去投訴，覺得我討厭都冇辦法，都幾心灰意冷。（情緒開始激動）完咗個活動打畀公司（開始喊），話我要休息啦，我頂唔順（拿紙巾抹淚），想休息一年（不停喊）。Mani 話可以休息，但係一年太耐，但我有打畀媽咪，我喊得好犀利（抹眼淚）。我同媽咪話我好
，我頂唔順。媽咪佢話好撐我，你唔想做就唔好做啦。但係我話OK ，淨係想休息，咁公司OK 畀我休息，但一路可以嘗試出邊畀我嘅感覺，拖拖拉拉都一年啦。雲：始終都係諗過想休息一段時間，有冇諗過想離開呢個圈唔做？嬌：都冇諗過，入呢行係為屋企人，想屋企人可以生活得好啲，我唔想就咁放棄，我都想有機會再試吓。雲：有乜嘢屋企人需要負擔？嬌：妹妹、媽咪、公公、婆婆、爺爺。雲：你係主要收入來源？嬌：都算係，如果我唔做嘢嘅話，我可以做乜嘢呢。雲：你有冇需要試過尋求心理輔導？嬌：匿埋喺屋企都兩個月，日日咁俾人鬧，所有都嗱晒出嚟畀人睇，好似冇咗私隱，過一刻都崩潰㗎。
日日睇新聞瀕崩潰
雲：有冇試過輕生嘅念頭呀？嬌：（哭著回答），有一刻有。雲：呢件事發生咗之後，外界對你嘅批評仍然非常之惡劣，完全唔接納你，好多人都話唔接納你，輿論係咁，有一個批判性喺度。你有冇覺得不如了結咗自己嘅生命，有冇試過輕生嘅念頭呢？嬌：（哭著說）有一刻有，因為我睇唔到自己個前途，唯一可以做可能真係了結咗自己生命咁就算。但係我諗深一層，死都唔係可以解決到問題。因為如果我死咗嘅話，可能有好多人就會停止唔會再講呢件事，但如果我真係死咗嘅話，咁我嘅問題就會落喺我身邊嘅人，同埋好多好關心我嘅人都會好傷心，所以我都好快打消呢個念頭。雲：不過我相信除咗呢件事之外呢，當其時點解輿論咁唔接納你呢，可能係以前你出席電影活動宣傳，或者你講過嘅嘢嘅言行呀，同今次啲照片出嚟見到另外一面嘅你，個形象好唔相符。例如其中一個喺馬來西亞，換衫嘅時候俾人偷拍相，你嘅反應都幾大嘅，你話會影響形象，你又會喊嘅，但睇到另外啲相，原來有另一個你喎，咁就會覺得，阿嬌係咪呃緊我哋？佢係咪虛偽呢咁。呢方面你自己有啲乜睇法？
嬌：我第一時間聽到有人喺個演唱會嘅時候，喺更衣室偷影我哋換衫，過刻真係好嬲，同埋真係覺得好似俾人強姦咗咁。因為我從來都冇諗過點解喺個更衣室會有人影到相。係偷窺咋，呢個行為叫偷窺咋，俾人偷窺嘅感覺同俾人非禮嘅感覺係一樣，你會好難受。但係呢件事影咗呢啲相，好唔好彩佢流咗出嚟，咁我都冇辦法。即係惟有硬住頭皮繼續向前走。因為自願同唔自願，真係差好遠。雲：件事過咗咁耐，喺呢個期間，有冇需要或者有冇試過尋求心理輔導？嬌：其實每一日Mani 都做咗我心理輔導師，佢會同我傾偈，even Charlene 、（容）祖兒，都會成日搵我傾偈，幫我想我快啲開心啲。因為我之前真係唔識笑，同埋匿埋咗屋企好耐。雲：幾耐？嬌：匿埋咗屋企我諗都兩個月，屋企閂晒簾呀，睇電視呀，屋企人唔畀我上網，因為我試過上網睇到好多網嘅人過啲好難聽嘅說話。佢唔想我唔開心，所以唔畀我睇，但我又唔想我出到嚟先知道發生乜嘢事，咁我用電話睇新聞呀，日日睇呀，過刻都幾崩潰㗎。雲：畀你最大支持嘅係邊一位？
嬌：屋企人，屋企人，因為冇諗過佢哋會話你唔想做，就唔好做，辛苦就唔好做啦，咁佢都唔想見到我，成日都唔開心，或者日日俾人鬧。我最希望啲人最起碼畀番我尊嚴咋，我唔覺得我有呢一樣發生之後，我就會冇晒尊嚴咋，做人最起碼係有做人嘅尊嚴。雲：你覺得而家冇咗呢一份尊嚴？嬌：冇。好似冇咗私隱，我已經冇咗私隱，好似已經所有嘢都嗱晒出嚟畀人睇晒，畀人知道晒，你所做嘅任何一樣嘢都會俾人鬧，我覺得尊嚴最重要，我唔希望繼續咁樣。雲：你準備點樣去嗱番呢份自尊？嬌：尊重自己。尊重自己，人哋先會尊重你。雲：你而家可以好勇敢咁樣行去面對群眾未？嬌：初時就唔敢㗎，因為匿埋咗喺屋企兩個月，係到真係出返嚟見人係學嘢咋，但唔敢見到其他人，直頭係遮住晒自己，冇人見到我㗎。雲：而家仲係？嬌：而家好啲，而家唔係，用咗一段好長嘅時間，我先至去真真正正，面對面咁樣，人哋見到我個樣，起碼我喺街度，我唔使耷低個頭，可以面對面咁望住人對眼咋。雲：呢件事對你最大嘅傷害，你認為係邊一個造成？嬌：自己咋，怪自己做呢啲傻事。
對陳冠希有怨無恨
雲：Edison 喺一年之前，你做完記者會之後，佢又有一個記者會，咁之前佢喺溫哥華作供有講過一啲嘅說話。你有冇睇番佢呢個記者會，或者睇番佢喺溫哥華作供嘅時候嘅報道呢？嬌：都有。係，唔知應該可以講啲乜。雲：你憎恨佢嘛？嬌：冇，冇話憎恨嘅，淨係覺得點解唔打嚟道歉呢，或者點解唔解釋番件事我聽，就係咁樣。雲：Edison 直至而家都冇同你打過電話，冇同你道過歉，咁你原諒佢嘛？嬌：我覺得我同呢個人已經冇關係，原唔原諒都唔重要。雲：如果你再見番佢，你仲會唔會當佢係一個朋友？嬌：我唔知。我諗我都唔會見番佢。雲：咁你一定唔再愛佢？嬌：（停了一會）冇關係啦已經。雲：呢件事件會唔影響到你將來，再識男朋友嘅時候，會格外小心？嬌：我覺得最重要嘅，過個男仔唔介意，唔介意我曾經發生過啲咁嘅嘢，即係包容，包容好緊要咋。雲：如果你唔係一個公眾人物，件事又冇廣泛報道嘅話？你識一個新嘅男朋友，你會唔會同佢分享晒你所發生嘅一切？嬌：有啲人唔會想聽，除非佢想聽，我唔介意講。雲：咁亦都唔會影響你將來去識異性？你唔會因為咁而對異性失去信心？嬌：唔可以，唔可以睇其他人個個都一樣㗎嘛。
阿嬌接受《志雲飯局》訪問並在紀念冊上留言，多謝陳志雲給予機會盡訴心中情。
http://appledaily.atnext. ... art_id=12463227
