上週五江欣燕由丈夫吳積遜接載到達醫院，已經暫停工作的吳積遜全程貼身照顧，令江欣燕感動不已。
有份參演無線處境劇《畢打自己人》的江欣燕，近年一直受白內障困擾，更因視力嚴重模糊導致暈眩，最近情況甚至有轉壞跡象。唔想再拖，江欣燕決定向劇組請假一個月，由丈夫吳積遜陪同，於上週五（二月二十日）到嘉諾撒醫院進行白內障手術。
嘉諾撒醫院（《蘋果日報》圖片）
抵達醫院後，吳積遜為太太辦理入院手續，在大堂等候上病房期間，吳積遜亦表現得憂心忡忡。
見四個月光
○七年經醫生證實患上白內障的江欣燕，當時正在拍攝處境劇《同事三分親》的她誤以為老花作怪，她說：「我以前成千度大近視，十年前做過激光矯視手術，直至年幾前開始覺得睇嘢好矇，最初以為有番近視，或者開始老花，舊年中秋節，抬高頭竟然睇到四個月光，真係驚到喊。」
今年才四十一歲，江欣燕坦言從來無諗過咁快有白內障，「我屋企有個八十幾歲嘅長輩係有白內障，但我都算後生啦，都唔明點解會咁，所以初頭都接受唔到，不過醫生話白內障冇成因，試過有案例只係得十二歲，醫生仲講笑話我早熟添！」
扮嘢功夫了得的江欣燕經常在無線的節目中扮演不同藝人，其谷胸嘟嘴扮梅艷芳的造型，維肖維妙。（《蘋果日報》圖片）
江欣燕與丈夫吳積遜於○一年結婚，她在大喜日子竟然做了「喊包」，就連她的父母及胞妹也備受感動而紛紛落淚，場面溫馨感人。（《蘋果日報》圖片）
江欣燕近年少在熒幕前扮嘢，不過去年出席好友楊其龍生日派對模仿郭晶晶，依然搶盡風頭。
現正拍攝《畢打自己人》的江欣燕因入院做手術而向劇組請假，其拍檔徐榮亦有致電慰問。
汶萊搵食
由拍拖至結婚前後十七年，一向錫老婆的吳積遜上週五一早陪住江欣燕去醫院辦理入院手續，其後江欣燕父母亦趕到醫院。
記者在週二（廿四日）致電已出院回家休養的江欣燕，她表示開刀後感到疲倦，目前要好好休養等候再做第二次手術，「前幾日做咗左眼，植入人工晶片，預計下星期可以做埋右眼，手術後有少少痛，情況愈嚟愈好，由於而家兩隻眼嘅視力有偏差，所以成日覺得頭暈暈，屋企人同老公都好照顧我，令我好感動，目前最辛苦係唔可以洗面同洗頭，唔可以俾水入眼，沖涼只可以浸浴。」江欣燕說。
由於江欣燕請假一個月，正在拍攝的《畢打自己人》唯有急改劇本，將她所飾演的神婆金堯堅角色，交代為去了汶萊公幹。至於與江欣燕甚多對手戲的徐榮亦表示已致電慰問對方，「佢平時都掩飾得好好，唔知佢咁大件事，我打咗電話俾佢，佢叫我哋唔使擔心。」徐榮說。
非老人專利
一般人誤以為白內障只會發生在老人家身上，但據香港執業眼科醫生會會長周伯展（圖）表示，白內障的成因是晶狀體隨喺年齡老化而形成，另外糖尿病、外傷、藥物、還有先天性因素都會引致白內障，當眼睛內原本清晰透明的晶狀體變得混濁，就會演變成白內障。白內障手術是在手術室用顯微鏡下進行，利用手術儀器替病人取出混濁的晶體，白內障被摘除後，會保留原來透明的後囊膜，用作支持植入的人工晶體，植入人工晶體可令病者避免佩戴笨重的無晶體矯視眼鏡。「正常係六十歲後先會有，不過近年的確有年輕化跡象，三、四十歲嘅人都會有，甚至有案例係初生嬰兒，不過呢類係屬於遺傳居多，早期嘅白內障患者可以用眼鏡同眼藥水改善，不過最有效根治方法都係做手術。」
