港男黃長發與富商T 先生的三奶李姿霆（Karen ）撻著，T 先生不堪臨老「戴綠帽」逼得揭開肚皮揚臭史大爆三奶醜聞，「癡男怨女」黃長發與Karen 則天朦光拖篋到機場「著草」法國暫避風頭；而Karen 母親心痛孫女冇人理，大鬧女兒跟「仆×發」走佬。T先生得悉三奶癡戀嫩男已到達無可救藥之地步，除立即封鎖經濟外，日前由美國返港，聯絡Karen 講數，並為爭取五歲女兒撫養權發生激烈爭拗，T 先生更以向傳媒爆其臭史來要脅Karen 就範，但Karen 不肯妥協，雙方關係破裂。儘管T 先生在其行業尚算有頭有面，本想低調處理以保存男人自尊，事發以來一直無顏面見人，惟三奶與嫩男情人日日高調接受傳媒訪問及亮相，此舉令T 先生不惜自揭肚皮公開自己戴綠帽真相。
離港最少十日
本來T 先生表示會召開記招爆大鑊，但昨日又改變初衷，選擇了兩間他認為在此事上偏幫他的傳媒做訪問，以為有助塑造他成為一個博人同情的「包養三奶的好男人」。
Karen 與黃長發得悉T 先生舉動，前日早上六時許到機場避走法國。由於黃長發於法國長大，要找落腳地一點也不困難，加上Karen 一直喜歡法國這個浪漫地方，故此決定暫時離港到法國，據悉兩人將離港至少十日。
本報就此事聯絡黃長發與Karen ，卻一直不獲回覆。而T 先生的電話則由司機接聽，強調T 先生不在香港，目前身在大陸，並否認T 先生接受記者訪問爆大鑊。
女兒唔要媽咪
本報再致電Karen 父親，他坦言不知女兒離開香港，而Karen 母親更「搶電話」激動地說：「Karen 兩日冇返屋企喇！丟低個女都唔理，我今日去湊放學，孫女攬住Miss 係咁喊，話要婆婆唔要媽咪！佢咁細個唔識講，淨係話因為媽咪件事唔開心，個黃長發正一仆×發，我個女跟佬走……」
談到日後的生活費問題時，Karen 母親更加激動：「佢雖然今個月畀咗八千蚊我，但我使乜佢養？我有樓收租，咪當生少個！我會負責養埋個孫女，但唔會畀佢睇近日周刊嘅報道，費事影響佢成長！我會集齊晒，等孫女十八歲就會畀佢睇，話畀佢知佢阿媽係乜嘢人！我個女成日鑽牛角尖，口口聲聲話唔知人哋有老婆，佢有乜可能會唔知？生咗個女又唔理，成日出去三更半夜先返。」
此外，黃長發的胞兄黃長興接受本報電話訪問，他揚言並不知胞弟離港。提到T 先生爆大鑊一事，黃長興說：「我唔知點解佢仲要走出嚟講，都冇人睇
啦！佢兩個又唔係圈中人，之前乜都講晒，又唔係咩好嘢！佢講乜嘢嚟中傷我細佬都唔會理。」
文：影視組
黃長發與Karen 的「孽戀」弄致滿城風雨，二人前日決定避走法國。 （資料圖片）
黃長發因教Karen 法文而撻著。
