黃長興同黃長發兩兄弟經常孖住夜蒲，前晚佢哋又被發現孖住去滾，不過同行重有佢哋嘅另一半，亦即係長興嘅老婆Peggy，以及長發個鬼妹女友。長興舊年喺法國同Peggy舉行婚禮，今個月16號佢哋會喺尖沙嘴洲際酒店擺喜酒。雖然近排忙於搞婚宴嘅嘢，但長興前晚都有帶埋老婆同細佬、細佬女友以及成班朋友打邊爐，一班人滾滾下聯誼。
【今日我至衰】黃長發鬼妹女友前晚喺車尾箱攞嘢嗰陣唔小心夾親手指，長發唔憐香惜玉呵番不特止，反而仲笑晒口，呢個男友真係好衰囉！
女友整親手
前晚9點左右，長興、長發一行多人去到九龍城南角道嘅禾牛薈火煱館打邊爐。食到凌晨12點半左右，長發就同女友先離開，原來佢哋將背囊同一袋嘢放咗喺長興泊喺門口嘅寶馬度，所以走嗰陣長發先攞哥哥條車匙攞番走自己車上啲物件。點知鬼妹女友喺車尾箱攞嘢嗰陣，唔小心整親手指，但長發唔單止冇呵番女友，反而仲笑佢㖭，一啲都唔體貼。之後長發上番食肆攞番條車匙畀哥哥，然後就搭住女友膊頭行去搭的士走人。至於長興喺食肆逗留到凌晨1點半先至同老婆以及朋友離開，攞車返屋企。
from:
http://hk.apple.nextmedia.com/entertainment/art/20130305/18184603
