鄭嘉穎與佘詩曼的戀聞日新月異，比連續劇還要精采。有見及此，無線再撮合二人拍古裝劇《宮心計》，加上早年《金枝慾孽》的後宮勾心鬥角故事大收旺場，劇集未開拍已經大收宣傳之效。昨日《宮心計》演員試造型，有傳已分手的阿佘及嘉穎口口聲聲冇尷尬，但現場所見態度生硬，嘉穎則辯稱到roll 機時才會入戲。
繼《金枝慾孽》之後，又一套講述後宮鬥爭的女人劇集《宮心計》昨日在將軍澳電視城古裝街試造型，約50名演員逐一出場，更特別介紹劇中幾位女主角米雪、關菊英、楊怡、佘詩曼及男主角陳豪與鄭嘉穎。
「希望多啲人注意」
鄭嘉穎、佘詩曼再度合作，無論過去或現在的戀聞都會成為焦點，阿佘說：「都控制唔到，不過都怕拍劇期間會俾人跟。」阿佘表示再次合作不會感到尷尬，但是在台上跟鄭嘉穎零交流，她解釋說：「哦！冇機會。」阿佘相信《宮心計》的劇情會比她的緋聞更吸引，她說：「我已經睇咗12、3集劇本，寫得好好，相信台前幕後都好期望。」在《宮心計》中鄭嘉穎、佘詩曼會發展成一對情侶，鄭嘉穎的戀事成為未開拍劇集的宣傳重點，他說：「唔好咁講，希望多啲人注意，而且都唔到我選擇，大家都知係宣傳手法。」被指在台上跟佘詩曼表現生疏，態度生硬，嘉穎反駁說：「都未roll 機，roll 先喇！」
左起：楊怡、關菊英、米雪和佘詩曼將在《宮心計》中鬥個你死我活。
左起：李詩韻、曹敏莉、葉翠翠在《宮心計》入面飾演爭寵貴妃。
米雪出門念尹佬
陳豪和楊怡合作無間，二人見面份外高興，又拖手又搭膊頭，楊怡更笑指陳豪是鹹豬手。
米雪在《宮心計》再跟關菊英大鬥法，關菊英說：「本來我係忠，同米雪細個係好姊妹，但我個人俾人蝦唔會退縮，所以同米雪會鬥過。」米雪表示拍劇時都會分配時間探男友尹志強，她說：「佢唔使我照顧，只係我成日想照顧佢，我最近出去拍劇，都有思鄉病，一出去就掛住香港，仲有掛住佢。」對於有消息指尹佬雙目失明，病情嚴重，她說：「尹佬冇事，好精神喺屋企，我同佢有出街。」採訪：楊潔雯攝影：陳慧安
傳已分手的鄭嘉穎與佘詩曼被要求合照，非常合作，但表情卻甚生硬，在眾人前更是零交流。
http://appledaily.atnext. ... art_id=12215007
