無線為慳得一蚊得一蚊，諗盡縮數，繼去年11 月裁員後，12 月突然通知各大唱片公司，不會再為歌手拍MV ，歌手想在無線宣傳新歌，要自備MV 之餘，連MV 版權都要一併無條件奉上。歌壇新天后謝安琪、陳奕迅、李克勤等紅歌手因所屬唱片公司不肯乖乖就範，搞到新歌在勁歌金榜猶如人間蒸發。
不過最近在唱片公司聯合反對下，無線終於放棄新制，重拍MV ，謝安琪、陳奕迅新歌即將在勁歌金榜重見天日。
諗縮數，係無線強項！（設計對白）
無線綜藝科節目製作總監何麗全承認無線停拍MV 後又拍番原因，是因與唱片公司講唔掂數。
謝安琪去年憑〈囍帖街〉成樂壇大贏家，而陳奕迅亦奪得勁歌金曲頒獎禮的「亞太區最受歡迎男歌手」，兩個歌手走勢凌厲，不過近日謝安琪派台三個星期的新歌〈祝英台〉及Eason 的〈allegro opus3.3am 〉竟未能登上無線1 月的「勁歌金榜」，人氣無跌watt ，但忽然消失於勁歌金榜，原因是被無線最新實行的縮皮橋所累，慘變砲灰。
去年無線因金融海嘯影響，為縮減開支已裁員二百幾人，又減少直播節目，總之慳得就慳。點知無線嫌未夠喉，去年12 月中
更度出停拍MV 縮皮橋，要各大唱片公司自行提供MV 給無線的音樂節目播放，連6 千蚊
左右拍一個MV 成本都慳番。甚至恃住係大
台有收視保證，年尾又有勁歌頒獎禮，要這些「自來片」的版權也無條件奉上。即是無線可將播MV 的音樂節目賣埠，或放在收費電視台播放，唱片公司亦無權過問，一個仙都收唔到。
唱片公司為歌手花幾萬元拍攝卡拉OK MV ，除了宣傳外，亦為賺取可觀播放版權費，因此新制簡直係攃住搶。
本地公司屈服
雖然好多唱片公司覺得政策唔合理，但無線始終係本地電視台大阿哥，故12 月出新歌嘅歌手只有兩條路行，一是就範，否則便在勁歌金榜中消失。
大台大石砸死蟹，本地華資唱片公司如英皇、金牌、東亞等惟有逆來順受。反之香港幾間國際唱片公司，因外國老闆處事講求原則，不肯妥協，它們包括旗下有謝安琪、陳奕迅、張敬軒及李克勤的環球；薛凱琪與方大同所屬的華納；周杰倫、陳栢宇所屬的SONYBMG ，都與無線鬥到底。
李克勤早前派新歌〈今夕是何年〉幫個唱造勢，點知因為MV 版權問題，搞到身為無線契仔嘅佢，新歌連影都冇。
容祖兒屬乖乖就範的一批，將自家MV 〈可歌可泣〉版權送俾無線都肯制。祖兒對此都唔敢多講，只係話：「我早排唔喺香港，唔知發生咩事，你都係問番唱片公司啦。」
剛成功上位嘅謝安琪，新歌〈祝英台〉未能入勁歌金榜，對此她經理人夏森美回應：「作為歌手只做好音樂，其餘嘅事，包括首歌上唔上到榜，咩MV 版權爭撬都交番俾唱片公司搞，我哋最緊要係新歌盡快配合宣傳。」
麥浚龍〈從此世界多一分鐘〉
容祖兒〈可歌可泣〉
胡杏兒〈浪漫世紀〉
鄭融〈無謂情歌〉
28/1/2009 勁歌金榜
一線歌手謝安琪、陳奕迅、李克勤嘅新歌因新制變砲灰，勁歌金榜少咗三個強勁對手，所以Juno 新歌有機榮登榜首。
身為BMA 歌手嘅周麗淇，就話唔理係咪蝕底，最緊要合作開心。「總之公司安排點就點，咩政策都無所謂。」
克勤都無影
其中首當其衝是為催谷5 月紅館個唱出新歌的謝安琪，因為環球不肯蝕住咁提供MV ，〈祝英台〉就無緣打入「勁歌金榜」。就算係無線契仔李克勤都一樣無情講，「左麟右李」新歌〈今夕是何年〉，就因環球同無線講唔掂數，同樣不見影蹤，勁歌金榜無影，自然影響他們09 年第一季選成績。
不過在就範的本地唱片公司中，亦有人對無線的霸道做法好唔順氣，更向IFPI （國際唱片業協會）反映，希望IFPI 幫他們討回公道。
新婚不久嘅梁漢文呢頭肯就範將新歌〈囍〉版權俾埋無線，點知轉頭無線又打回原形拍番MV ，送咗出去嘅版權無得嗱番，新歌真係派不逢時。
知理虧補鑊
在唱片公司聯合反對下，無線也自知理虧，所以1 月24 日突然向各唱片公司收回承命，發電郵通知唱片公司改回舊制，由即日起重拍MV 。
知情人士透露：「國際唱片公司夠膽同TVB 撐，因為呢類公司除咗揸住本地MV ，仲有好多外國如歐美，日韓同台灣嘅MV 喺手，如果TVB 係都要嗱埋MV 使用權，國際唱片公司唔肯就範，TVB 好多外國MV 都無得播，都係一個大損失。」
對於突然回收政策，無線綜藝科節目製作總監何麗全解釋：「點解無線拍番MV 嘅
問題好複雜，不過簡單啲講其中因版權問題傾唔掂，又唔想無咗啲歌，所以公司都係想擁有番屬於自己嘅MV 。（咁當初唔拍MV 係咪為縮皮？）唔係錢嘅問題，係資源問題啫。」今次無線偷雞唔到，仲搞到一鑊泡，
爆！
唱片公司高層回應
英皇吳雨 有利益衡突
「我身為IFPI 嘅主席，過年前都有喺會上提出過呢個問題。我俾MV 電視台播無問題，但去到要永久擁有個版權就真係牽涉到利益衝突，所以都諗住過年後同無線傾傾，點知未傾佢哋話打回原形，咁咪好囉。當日祖兒首〈可歌可泣〉同群星唱嘅〈唱旺09 〉卡拉OK 版版權俾埋無線，係因為趕住出碟做宣傳，所以無時間同佢傾，俾咗嘅版權想嗱番好難，不過好彩都係俾咗幾首歌啫。」
環球黃劍濤 未有期啫
「絕對唔係傳聞所講因為版權問題唔提供MV 俾無線播，只係旗下歌手好似謝安琪同陳奕迅等未有期拍MV 啫。」
金牌大風黃柏高 交俾IFPI 處理
「之前同無線為MV 版權問題，我哋交俾IFPI 處理，由唱片業決定點傾，不過我就唔介意版權俾無線，最緊要係配合宣傳。」
無線縮得就縮
一折千金
07 年好多無線藝員上遊戲節目「一擲千金」時贏得幾十至幾百萬獎金，以為佢哋成筆獎金袋落袋好鬼開心，查實只得觀眾參加者可嗱全數，如果是無線藝員通通要一折收貨，即係贏到300 萬，實收30 萬。
換卡士
無線12 月開拍新劇《占星情緣》，原本找100 萬酬勞的張智霖回巢助陣拍住嗱女楊怡，不過最後因閂水喉，寧願卡士弱，都棄用張智霖，改用月薪2 萬嘅自己人謝天華。
