一場金融海嘯，賭王何鴻燊身家蒸發九成，不過三姨太家用照舊、重禮照收，四姨太就錢照捐，善事照做。只是賭王仔女就要慳住使，二房兒子何猷龍自爆身家縮水慘過爹哋，何超儀乘機搲撈，更叫大家勿再佔他們便宜。
美國財經雜誌《福布斯》公佈09年香港富豪榜，位位身家大縮水，其中賭王何鴻燊身家更暴跌九成，只剩78億港元。何猷龍前晚在中環出席上市公司商會活動就說：「爹哋唔會唔開心，佢唔係縮好多啫，我自己就縮到冇得再縮，縮咗九成幾，我慘佢好多！」他謂不會為慳錢少出街，他說：「咁未到咁慘。」反而想放長假，去環遊世界。
三姨太行頭依舊
何超儀07年底曾獲《福布斯》選為20位最迷人富家女的第八位，她昨日得悉賭王排名下跌，即說：「弊！咁我咪即係冇得上榜？咁各界人士睇到報紙，唔好再嚟搵我哋笨啦，多啲搵我做嘢，刺激吓我嘅經濟，我會生生性性，茄喱啡都撈。」問她會否減少問父親要錢？她說：「我其實從來冇問爸爸嗱錢㗎！」三姨太陳婉珍昨日在上環出席東華新春團拜，一身Dior 套裝、珍珠耳環打扮，行頭派頭如常。談到賭王身家縮水，她說：「個個富豪都有，唔止我先生，呢啲數字遊戲，冇乜所謂，冇影響我哋。」她謂年初二至年初六，賭王和她到珀斯旅行，更送了珍珠頸鏈，送禮絕無縮水。至於有否扣減家用？她說：「冇！」但她會叫仔女慳著花，她說：「佢哋讀緊書，冇乜點使錢，但都會叫佢哋經濟唔好，睇住啲，最緊要有學識，有學識就可以隨時翻身。」
三姨太陳婉珍透露賭王家用沒有減少，一切如常。
何猷龍自爆身家跌幅逾九成，比父親賭王更慘。
四姨太一早識慳
賭王何鴻燊身家縮水九成，四姨太梁安琪就表明不擔心。 資料圖片
四姨太梁安琪接受電話訪問時則說：「有乜好擔心？過啲（報道）都好信。」會否慳家？她說：「一早就識慳啦，成年咋，個個都要慳，要知道個大環境係點，要應變㗎，唔應該話係慳，係要用得其所。捐錢我咪唔慳咋，一樣照支持，貧富懸殊，啲需要幫嘅人，我哋有能力，更加要幫多啲。」採訪：羅慧敏、林妃攝影：林德雄
超儀與老公陳子聰一向不憂衣食，聞父親身家勁跌即搞笑搲撈。 資料圖片
from
http://appledaily.atnext. ... art_id=12175910
