跟無線小花唐詩詠（Natalie ）拍拖四年半的陳志雲旗下猛將崔建邦（Amigo ），因為拖台灣模特兒Renee 返屋企過夜偷食斷正，令四年情無可挽救。
先後被傳搭上宋熙年、甄詠珊、台灣模特兒以及袁彌明，近日又轉
力追甩拖徐淑敏，Amigo 的偷食惡行接二連三，每次東窗事發就扮死狗認錯，啞忍多時的唐詩詠決定唔再心軟，執行李搬返廣播道娘家各行各路。為怕爛滾形象影響事業，分手後崔建邦日日致電唐詩詠求饒封嘴。
對於賤男所作所為，唐詩詠斬釘截鐵表明態度：「我以後唔想再提呢個人。」
唐詩詠跟賤男甩拖後，心情低落，早前搵好友林子萱傾訴心事，其間更數度落淚，愁容滿面。
鋪路扮可憐
上月中，陳志雲為《志雲飯局》舞台版舉行記者招待會，當日擔任司儀的崔建邦突然被陳總踢爆俾女飛，一副可憐樣。
「其實係Amigo 激走女朋友，佢哋已經住埋兩年，Amigo 仲成日出去溝女，Natalie （唐詩詠）知嘅都起碼有十幾次，不過個男人把口識冧人，認完錯又冇事。」知情者說。
數月前，唐詩詠收到風Amigo 搭上台灣模特兒，更親眼目擊他倆雙雙離開二人同居的愛巢，有晒證據，唐詩詠終於死心。「嗰排Natalie 好少返去（同居愛巢）訓，有日做完嘢無端端撞咗返去，竟然俾佢見到Amigo 同個台灣妹朝早喺屋企出嚟，Natalie 覺得無理由再忍落去，同佢吵大鑊，跟住搬返去阿媽屋企住。今次Natalie 嬲得好緊要，堅決唔會復合，Amigo 怕佢爆大鑊，預先同佢講話陳總都知道咗件事，會喺《志雲飯局》個記者會講出嚟，叫Natalie 唔好同記者講咁多嘢，佢（指Amigo ）認咗分手就算。」知情者說。
二人在去年十二月尾上《獎門人》遊戲節目，被志偉大玩，其實當時崔建邦已經一腳踏兩船，搭上台灣模特兒，而正印唐詩詠亦一直啞忍。
崔建邦去年換新車，將舊福士送給女友，不過人在車在，分手後即收回自用，唐詩詠亦買了甲蟲車代步。
本刊在去年八月時已經拍到貌似張茆的Renee Li （黃圈者）跟崔建邦夜蒲，並坐他的Audi 跑車離開，不過當時女方仍未踩上正印跟崔建邦位於廣播道屋企。
徐淑敏甩拖無耐，即成為崔建邦獵物，但據知見過鬼怕黑，以事業行先的Suki 未為所動。
追徐淑敏
食得唔好曬，Amigo 的偷食「業績」多不勝數，甄詠珊、宋熙年等，仲有好多於夜場中認識的圈外人，其中袁彌明便公開踢爆他追求不遂，於是在陳總面前篤背脊，令她被無線投閒置散，二人亦因而反面。近期Amigo 又以甩拖「咪神」徐淑敏為目標，大獻殷勤外，更狂發短訊，可惜無功而還。
「Amigo 同宋熙年好過一排，好多圍內朋友都知道，俾人踢爆咪同Natalie 認錯囉，不過今次無咁容易，因為帶埋返屋企玩，Natalie 好傷心，但佢有品，唔想對方做嘢，所以兩個早排一齊出席朋友婚禮仲扮無事。」知情者說。
與高大有型靚仔完全無關的Amigo ，能夠𠝹女得心應手，全賴與陳志雲關係密切。據知，Amigo 每在夜場發現獵物，便以高層愛將身份，拍心口介紹對方入無線做明星作為撒手
，今次帶返屋企過夜的台灣模特兒叫Renee Li ，在雜誌《MR 》兼任記者，並客串模特兒，本刊去年八月便拍得二人在蘭桂坊夜蒲，近月Amigo 不時帶著Renee 跟洪天明一班朋友劈酒玩天光。
陳志雲錫崔建邦錫出面，上月二十日出席記者會，預告愛將失戀，減低對方拖女過夜負面形象。（《蘋果日報》圖片）
唐詩詠媽咪入院做手術，侍母至孝的她，請了兩星期假留在醫院，不過崔建邦就未有出現過。
無情無義
情傷未癒的唐詩詠，母親健康又每況愈下，認真黑。「Natalie 近排真係好慘，不單失戀，媽咪又心臟衰竭，嚟緊要做大手術，要經常去醫院探媽咪，新年嗰幾日，醫院准佢媽咪放假返屋企，Natalie 日日陪住老人家，Amigo 知道佢屋企有事，居然仲乘機偷食。」知情者說。
為母憂心的唐詩詠，日前相約好朋友林子萱到海港城的UCC 傾心事，其間更數度流淚，二人傾到晚上八時才離開，之後唐詩詠揸車過香港仔葛量洪醫院探母親，逗留至晚上十時才離開。
致電唐詩詠問她與崔建邦分手一事，她反應斬釘截鐵。「我同佢分咗手，以後唔想再提呢個人。（佢收番送俾妳嗰架二手車？）我揸緊架車係用自己錢買嘅。（妳知唔知佢而家追緊徐淑敏？）唔知，唔想知。（妳媽咪係咪要做手術？）佢身體係差啲，我請咗兩個星期假陪佢，不過唔可以再請落去，因為而家得我一個養家。（Amigo 有冇去探妳媽咪？）冇。」
（《忽然1 周》圖片）
（《FACE 》圖片）
見一個追一個的崔建邦，跟唐詩詠拍拖期間，先力追袁彌明、甄詠珊，後搭上宋熙年兼同時狂溝模特兒，精力無限。
偷食代價
色字頭上一把刀，唔少圈中男藝人依然冇有怕，背住女友或老婆到處孔雀開屏，賠上愛情與事業，甘心加入賤男行列。
倪震
去年底倪震偷啜城大學生張茆，事件曝光後他聲淚俱下自稱患上「中年危機」，但竟獲周慧敏原諒，二人於今年年初在金山花園寓所舉行婚禮，倪生倪太形象急插水。
（《蘋果日報》圖片）
陶大宇
陶大宇跟郭羨妮拍《學警出更》時撻著，向太太黃慧寶提出離婚，其後郭羨妮為保事業與對方劃清界線，雙失的陶大宇雖浪子回頭，但未能挽救事業。
（《蘋果日報》圖片）
梁榮忠
○五年，背住女友鍾麗淇跟朱慧敏在車廂中親熱，梁榮忠事業翻身無望，跟女友鍾麗淇亦箍煲不成。
