江欣燕同老公吳積遜結婚十幾年，點計都算老夫老妻啦，點知仲非常好火！上周四（1 月15 日），媽咪姐響跑馬地撞到佢兩公婆逛街，佢哋你攬我腰，我搭你膊頭，直情連體嬰咁過馬路。之後佢哋停響間文具舖門口睇咗一大輪，兩人前後腳咁行入舖頭。說時遲那時快，吳積遜情不自禁咁用手輕撫欣欣個pat pat ！嘩，佢兩公婆呢團愛火，真係睇到旁人好羨慕。
十幾年夫妻，欣欣兩公婆仲攬到脆麻花咁，連賓賓（左）都面露羨慕神色。
行入文具店時，積遜忽然輕撫欣欣pat pat 。
搞一大輪，原來係買兩款禮物紙。咁，都係情趣嚟。
欣欣挽近十萬嘅Hermes 手袋，但就塞到爆晒，拉唔埋拉鏈，真係貴袋cheap 用。
好事嚟嘅，媽咪姐祝佢哋呢團火愈燒愈旺！
