被指「維穩」嘅曾志偉最近辭退演藝人協會會長一職，佢自爆無綫易主後有不停獻計仔，早前仲做埋監製幫無綫拍新劇《M Club》，聽講已接近尾聲。前晚8點幾，鄭丹瑞（阿旦）同一班女主角李若彤、李麗珍、張慧儀及江欣燕喺中環拍外景。
江欣燕前晚拍攝《M Club》，佢喺劇中神志不清，由姊妹葉蘊儀、張慧儀同李若彤陪佢上救護車。江欣燕前晚企喺一棟舊樓天台邊，由於有一定危險，製作隊出動大型吊臂車幫佢吊威吔。
江欣燕
跳健康舞嗌攰
無綫成日俾人話製作好流，唔知係咪大戰前夕，今次好認真，專登book咗架真嘅消防車同救護車。江欣燕着住格仔病人服，隻腳受傷，神志唔係好清醒咁俾人送上救護車。張慧儀帶埋10歲養子Hanson到場，Hanson雖然有先天性心臟病，但見佢喺現場好活潑，見到媽咪收工即拖實媽咪，仲同記者講拜拜。
凌晨時分，江欣燕等人轉地方去上環一棟唐樓拍攝，佢要喺天台邊行嚟行去，望落幾「牙煙」，無綫出動大型吊臂車幫佢吊威吔，估計係拍番頭先送院前企跳嘅戲份。之後欣欣再同李麗珍、李若彤喺天台跳健康舞，李若彤跳咗幾十秒已經喘晒氣，跟住就話：「好攰呀！不如食消夜先啦。」
採訪、攝影：朱志聰、陳辰、畢紹基
李若彤同李麗珍喺天台跳健康舞，李若彤跳咗幾十秒就喘氣。
張慧儀帶養子一齊開工，離開時同記者講再見。
from:
http://hk.apple.nextmedia ... 131028/18482132
