玄學家麥玲玲師傅前晚去咗《蘋果》網站直播節目《娛樂開CHAT 》，有佢做節目嘉賓，主持人懷鈺當然要問吓佢今年成個娛樂圈嘅運勢啦！玲玲師傅就話今年成個娛樂圈包括歌、影、視都好難搵錢，但係一啲有關打仗同功夫嘅電影就可以突圍而出，亦即係話以梁朝偉同金城武作號召嘅賀歲華語片《赤壁─決戰天下》，同埋由甄子丹主演《葉問2》嘅成績都應該唔錯。玲玲又話生得矮同年齡介乎35至45歲嘅中女都較容易搵錢，仲話靠把口搵食嘅歌手同DJ ，如果口大嘅話都好著數，懷鈺就話覺得口大嘅黃宗澤同矮仔王祖藍好掂，但以馮仁昭睇，要符合中女、矮小身形同口大呢三個條件，38歲又細細粒嘅商台DJ 阮小儀就中晒，而玲玲師傅自己都中兩樣啦！
阮小儀符合晒玲玲師傅預測嘅條件，包括身形矮細、口大兼係年屆38嘅中女。資料圖片
去年同Alex 結婚嘅Kelly ，有望喺今年上半年懷孕。資料圖片
陳慧琳有喜成數高
另外，懷鈺又問到玲玲師傅邊對夫妻喺今年最大機會有BB ？玲玲師傅話：「陳慧琳喺咁多對入面，有喜指數係最高嘅，好大機會上半年就有BB 。」咁是非多多、09年第一對新人倪震同周慧敏呢？玲玲師傅就話周慧敏係會有BB 運，但只會係呢兩年發生，如果過咗2010年，想有都好難喇！大家可登入《蘋果》網站http://ent.appledaily.com 隨時重溫節目。
麥玲玲（左）同主持人懷鈺日前暢談娛樂圈09運勢。
from
http://appledaily.atnext. ... art_id=12043854
