現年42歲嘅商台熟女DJ阮小儀，早年同拍拖7年嘅理工設計系男友分手後，呢幾年都有幾段霧水情，但都未能開花結果。小儀日前出席新春活動，單身嘅佢話唔介意出擊女追男，仲話見到啱心水就會表白。
身高僅四呎十吋嘅小儀前日傍晚6點幾，就孖住高佢成呎、貌似洪天明嘅高大猛男現身中環蘇豪，佢哋親身演繹電燈柱掛老鼠箱，兩人好夾一齊做截過海的士嘅手勢，睇真啲個男仔原來係商台節目《早霸王》監製阿金，等車時阿金當街煲煙頂癮，的士到又畀小儀上先，好有風度。
森美句句寸爆
小儀噚日喺電話訪問度大笑否認拍拖，不過佢同阿金好襯好合拍喎，小儀冇咁好氣話：「襯乜鬼，我咁矮，佢咁高。」小儀雖然係剩女，但佢自爆大把人追，皇帝女唔憂嫁。小儀好拍檔森美聽到佢同阿金爆緋聞，喺電話笑唔停咁話：「阿金有女朋友，佢揀嘅都係青春貌美。」森美明寸小儀話：「小儀結婚我包佢一圍，佢同阿金結婚，我包阿金一世，肯定冇可能，如果係真，比俄羅斯大殞石降落更震撼，阿金揀小儀嘅話，我真係睇錯呢個後生仔咁重口味。」
採訪、攝影：梁繼光、黃曉程、丁寧
身高四呎十吋嘅小儀（右），前晚同高佢成呎、貌似洪天明嘅商台節目監製阿金揚手截的士。
小儀日前出席電台團拜時話遇啱對象會出擊力追。
from:
http://hk.apple.nextmedia ... 130222/18172803
