無需伽俐略寫一大堆方程式，42吋胸肌加6舊腹肌，我都識計——等於黃德斌理所當然地爆肌的專訪大相。
「今次唔除衫喇，佢響《珠光寶氣》里面個形象都唔係咁肉感。」經理人在拍照前已經表明態度，令我拍這張大相時毫無頭緒，哈哈哈哈。
從另一數字出發，45歲加入行20年，又有幾多人有興趣知道黃德斌的內心世界？
原來，黃德斌一早有個英文名叫Kenny ，不是為演好《珠光寶氣》同性戀者而改的；鍾意音樂，「Concert 我都鍾意睇，唉，晨早買定飛睇Kraftwerk （老牌德國電子音樂樂隊），點知要去馬來西亞做嘢。」前排被拍到去欣賞英國樂隊Duran Duran 的演唱會，陳奕迅？「都有睇碟睇過。」
問佢點解吝嗇胸前兩點咁孤寒，「喂，其實我都會覺得尷尬㗎，哈哈哈，呢個唔關有冇自信事。」
仲有，愈老愈man 的人竟然怕談及年紀，「你哋年年都響度同我倒數咁，好似話，喂，你差唔多喇喎。喂，我仲大把時間做呀！」
的確，原來唔係大隻佬加鬍鬚粗獷樣就等如原始獸性，至少黃德斌話自己唔會有中年危機：「時間無多喇，快啲去搞多啲喇。我從來唔係咁。」不用做實驗，以Physics 、Biology 或常識推斷，擺阿黃生落酒吧，應該引到唔只一個神奇的A 茆茆，如果佢著少件衫的話。
響街有啲女fans 見到我都幾興奮，會攬吓你，有啲多手繑住影相摸吓我個胸話：『嘩，你好大隻呀！』
肌肉工作
幫手借衫做形象的同事說：「吓？唔除衫咩？我上星期先同佢影完相，除晒㗎喎？」喂，大隻斌，點先？「咁唔同，嗰次係廣告嚟。」
都好，夠坦白，「我都唔係婆媽嘅人，但我會覺得係咪真係要咁多呢？有冇需要咁做呢？唔係話保持神秘感，有需要就做，我又唔係嗰種叫你畀我除衫露肌嗰啲，哈哈。」10分鐘前我剛和攝影師說笑：「呀，反而上次訪問黃宗澤，佢啲助手主動話唔介意開胸露肌。」大隻斌插嘴：「佢都露？」我話另一位黃生剛拍完《烈火3》幾弗啊，「唔係瘦咗就勁嘅，哈哈。我都唔係天生大隻，中學都係打波游水，係入行做model 時狂操先有肌肉。」縱使不露兩手，對自己的身形還是很有自信的。
如果大隻斌入行時有港男選擇，他的演藝道路可能會有捷徑。「呢個年代大隻可能係有啲優勢，其實我以前都大隻，以前都有剝過，我啱啱入TVB 做仲大隻呀，係而家啲人觀念唔同咗啫。不過，就算嗰陣有港男，我應該都唔會去選，我係對演戲有興趣啫，又唔係鍾意show off 一啲嘢，其實都有少少矛盾……」
而家個年代，女性大解放尖叫，表明對胸肌的渴求，「都係，響街有啲女fans 見到我都幾興奮，會攬吓你，有啲多手繑住影相摸吓我個胸話：『嘩，你好大隻呀！』我女朋友響隔籬都係咁。」
「接受到，大佬，我做呢行，唔准人鍾意我，咁我仲使撈？」
女友係邊位？「咪成日影到嗰個囉，影親都係我同佢響超級市場買嘢，或者行街食飯。」相中人就係喇，但點解黃德斌個樣咁似陳豪？嗰排興咩？《壹週刊》圖片
憑《火舞黃沙》奪得最佳男配角，早過夏雨一年，再早過黎耀祥兩年，都算係咁啦，仲唔結婚？藉口咋？講笑，唔好打面。《蘋果日報》圖片
全程打大個心口演《火舞黃沙》不育宋東陽，之前又有太監角色，近排又做同性戀，全部係老友戚其義作品，「可能佢暗啞底唔妥我，哈哈。」
中年危機
遇到差不多年紀的，近排都愛談及中年危機。「咩中年危機先？你想我講咩呀？哈哈。我知你好想問我感情問題，但我可以講畀你聽其實我就好似普通人咁，冇咩驚天動地嘅愛情發生過。」普通人眼中的普通人，應該係時候結婚生仔，前排也有報道傳黃德斌會結婚，「多謝晒，可能個記者覺得呢條友冇咩講，講佢結婚啦。」
呢個年代係男人偷食完都仲可以拗翻生結婚，「結咗婚咁又點？如果驚呢啲嘢，結咗婚咪仲衰。呢個女朋友都拍咗拖五年以上，我份人唔係咁輕易同人發生感情，『喂，時間無多喇，快啲去搞多啲喇！』我唔係咁。以前都係讀完書先開始拍拖，讀書成班友淨係鍾意踢波打波，但係你話有冇俾女溝呢？我哋呢啲梗有啦，哈哈哈哈。」
大眾理由，結婚係生仔通行證，個個都係今年結婚下年擺滿月，「我都鍾意小朋友，但有啲怕，可能我自己嘅成長經歷唔係太開心，想有一個好好嘅環境畀自己嘅細路先考慮生。而家咩環境？而家都ok ，但邊度有話搵夠㗎，而且都未去到豐衣足食階段，有車有樓都係死慳死抵咋。
「咁我細佬又有細路喇，我唔使咁急啦。」
黃德斌在《珠光寶氣》宣傳活動抽中手表一隻，即轉送給邵美琪，「嗰次佢話我一定會中獎，不過要中咗先送畀佢，點知真係抽到，啲傳媒朋友幫我哋宣傳吓啫。」係囉，呢個星期都講到要結婚戲咯，不過都係為咗最愛林保怡啫！《蘋果日報》圖片
睇佢個款，唔蒲？「不嬲都唔係好出去蒲，我都唔識飲酒。」唔係掛？「唔識嘅意思，係我唔知嗰枝白蘭地有幾靚，呢枝紅酒有幾貴啫，我飲得嘅。」《蘋果日報》圖片
「《真情》係第一個轉捩點，出街有人嗌我越南（角色名）；《火舞》係第二個，出街有人嗌我黃德斌。」
經理董事
未結婚的理由，還有事業未算有成，「我都算好幸運，好多角色都令人記得、《真情》嘅越南、《妙手仁心》嘅何得廣，《金枝慾孽》嘅小祿子，不過人哋淨係記得個角色名，係到《火舞黃沙》嘅宋東陽開始，終於有人知小祿子叫黃德斌。」
好歹也在06年憑長期處於打開心口狀態的不育宋東陽，得過「萬千星輝最佳男配角獎」，「嗰剎那間都會諗：『終於有機會上位喇。』嗱獎嗰下都有激動。」不過，黃德斌的事業就是不會一鼓作氣，彈一下沉一排。「做咗一段日子就習慣，就算你做主角都唔會鋪鋪爆，冇得你甘於唔甘於，咁唔通你話啲人做咗經理就一定要做董事？咁淨係畀你做經理你做唔做啊？唔做呀？」最弊經理同董事中間仲有副總經理、總經理等等，「老套啲叫隨遇而安、實際啲叫知足，近幾年，我細佬個仔都會問吓我做戲啲嘢，以前，佢哋淨會問：『咦，你出咁少嘅，出一出就冇嘅？』」
或許，真正原因，是人長大了。
這可能是理性和感性想法的分別。
宅男
估唔到，叫黃德斌谷肌，佢竟然話張相自己個樣太緊張，想輕鬆啲，但係，含笑谷肌，通常只會出現響《雄風》封面……
反而，要求拍一個鬼馬造型加表情，大隻斌二話不說：「好呀，其實我都好想有機會拍喜劇，拍緊嗰套《飛女正傳》就係輕鬆喜劇……」
其實，大隻斌份人好nice ，成日笑笑口，唔係幕前咁cool 咁硬繃繃，訪問中最柔情一面，係講起愛犬逝世，「而家隻老虎狗幾個月啫，以前嗰隻走咗喇。好慘，真係好慘，我仲記得響九號風球嗰晚……」
呢個肌肉佬，原來又幾宅男吓喎！
