俗語話秀色可餐，黃德斌用咁甜嘅眼神望實女友，佢應該好飽，唔使食啦！
甜蜜玩Phone
【中環歌賦街】
今年48歲，以42吋巨胸成功出位嘅黃德斌，一向長情就係人都知，雖然同女朋友黃美恩（Joyce）拍咗咁多年拖都未拉埋天窗，但至少身邊冇其他女人出現，同埋冇乜緋聞就已經值回票價，做佢女人可以安心又放心。
黃德斌唔止對人係咁，對身邊事物都一樣。前日下晝五點幾，佢又帶住Joyce去咗中環歌賦街好出名、喺巷仔賣蕃茄牛肉麪嘅大排檔開餐，記憶中佢哋先後已經唔止一次幫襯，仲經常畀人影到佢哋喺度食嘢。
細聲講大聲笑黃德斌同Joyce坐低之後，各自叫咗碗招牌麪，其間黃德斌望住女朋友嘅眼神充滿柔情，真係溫馨又甜蜜，一邊食一邊教女朋友用智能電話嘅功能，又開相畀佢睇，真係好細心，兩個人仲細聲講大聲笑，好似一對拍拖冇耐嘅情侶咁。
黃德斌同女友一餐下午茶食咗半個鐘，其間老闆娘同老闆都有過嚟打招呼，就知佢係熟客仔。食完之後，女友行先，黃德斌找完數就一齊行過對面馬路攞番架車，以黃德斌今時今日都叫搵到，而佢架Volvo旅行車有成七年車齡都未換，又再一次證明佢份人幾長情。
