搣下巴 聖誕正日當晚，張舒雅（右）同補習天王男友David Chiu （左）落Volar 蒲天光，仲飲到面紅紅，完全唔似有病。
有「富貴港姐」之稱的張舒雅（Edelweiss ）自參選以來負面新聞多多，除被踢爆爛煙爛蒲，又傳多得富豪uncle 做後台先嗱到冠軍。以為佢孭住個冠軍銜頭會生生性性，點知最近又玩嘢。
張舒雅繼上月以健康為由退選世界小姐後，月頭又話抵受唔到精神壓力而向無線請假唔選中華小姐。有病大過天，但本刊卻發現「體弱」張舒雅於聖誕節當晚扮到孔雀咁靚，孖住補習天王男友趙永康（David Chiu ）在夜場開屏蒲通頂，之後仲醉住返男友寓所過夜，擺明詐病呃無線。
咁大膽，無線真係隨時可以褫奪佢嘅港姐后冠喎！
當選後曾經講過自己成熟大個女的張舒雅，今次扭計扭出火，睇嚟以後想響娛樂圈再發展都唔係咁易。
醉住攬 玩到興起，張舒雅仲從後攬實男友，不過張當晚齋飲酒冇食煙，似乎真係戒甩咗。
擒到實 玩到接近清晨5點，呢位反叛港姐先捨得搭的士走，不過唔係返自己屋企，而係上男友曉峰閣屋企過夜。
黐返歸 手挽約值$25,000舊款Chanel Flap Bag 的張舒雅全程挨實男友，應該真係好醉喎！
戀愛大過天的張舒雅一向唔放無線在眼內，當選後仍然不避忌，多次當街跟現代教育數學天王男友David Chiu 攬攬錫錫。今次更放肆，月初以健康理由向無線申請退選的張舒雅，轉頭卻鬼咁精靈孖住男友蒲通頂。
箍實男友
上週四（25日）聖誕當晚凌晨，張舒雅跟男友及大班朋友到中環Volar 慶祝。當晚張舒雅豪劈一杯又一杯，又不停隊其他人飲。Natural high 之餘，張舒雅仲表現得對男友好肉緊，又箍又攬又啜。玩至清晨五點，腳步浮浮的張舒雅才盡興繑實男友，齊齊搭的士返男方位於中半山曉峰閣寓所過夜。
張媽冇符
據知情人士透露，參選華姐要投入長達三個星期的集訓，張舒雅因唔想離開男友咁耐於是扭計退選，就連佢媽咪都冇計：「Edelweiss 根本冇病，只係任性。佢媽咪原本諗住佢做咗港姐會定性，點知都係話唔聽，成日去男友屋企過夜唔返九龍塘大宅，今次無線都有搵佢媽咪傾，點知連佢媽咪都搞佢唔掂。」
張舒雅（左）週日（28日）同母親（右）等家人外出食飯時，竟然反口話自己冇病：「我冇病，唔使食藥，只係唔慣做嘢咁緊迫，我同公司關係冇問題！」
TVB 高層：佢破晒紀錄
張舒雅週日接受訪問時仲明目張膽話自己冇病，只係「唔慣工作太緊迫」而請假。對於張舒雅詐病退選世姐及華姐，無線外事部副總監曾醒明本週一在電話無奈表示：「張舒雅簡直破咗歷屆港姐紀錄，從來冇港姐缺席多過一個國際比賽！（會唔會褫奪佢冠軍銜頭？）佢有醫生證明，我哋惟有接受佢解釋，但暫時我哋都唔會安排工作畀佢喇！」
冇人撐
與張舒雅同屆的馬賽及高海寧表示唔清楚張的病情：「佢有醫生報告，應該唔會假掛！不過我哋成個月冇聯絡，send SMS 畀佢都冇覆，之前淨係知佢有鼻敏感，唔知佢有情緒病喎！早排見佢都仲好開心，周圍撩人講嘢同成日笑㗎！」
姊妹落藥
高海寧（左）及馬賽上週日（28日）出席活動時踢爆張舒雅唔似有情緒病，更忍唔住笑佢淨係有鼻敏感，擺明唔信佢有病！
《蘋果日報》圖片
高層寸爆
無線外事部副總監曾醒明：「張舒雅有醫生證明，我哋惟有接受佢係唔適宜參選，費事夾硬要佢參賽，到時有事又要中途退選啦，至於佢休息期間去蒲，可能佢想減吓壓呢，佢話自己壓力大啊嘛！」
張舒雅扭計，造就亞軍陳倩揚（左）有機會連續參加世姐同華姐。
81年《香港電視》封面 羅佩芝
剝冠有前科
原本係81年香港小姐冠軍的羅佩芝（圖），當選冠軍後被發現虛報年齡及學歷，無線於是宣布褫奪其港姐名銜，最後改由亞軍勞錦嫦（大班鄭經翰太太）頂上。褫奪后冠有前科，張舒雅唔好咁老定喎！
爛蒲扯煙
陪仔便便
寸得起
張舒雅爛玩，選港姐期間不斷被踢爆其豪放行為，曾醒明承認曾好言相勸，但指張在外國長大，始終較為開放。
張舒雅不斷玩嘢，雖被無線放入「雪櫃」，之不過畢業於加州柏克萊大學的張家底豐厚，父親張敬猷開設大寶珠寶，更是遊戲節目《獎門人》多年贊助商之一，跟TVB 關係要好，名下更擁有市值過億的兩間尖沙咀商鋪及與家人同住、市值1億的九龍塘對衡道5千呎獨立屋。
