港姐冠軍張舒雅自參選以來形象麻麻，近日傳她有情緒病而退選國際中華小姐，昨晚她終於現身，堅稱沒有情緒問題，只是疲勞過度需請假。並自稱初出茅廬，不慣工作緊逼，但她表示有和其他佳麗SMS 聯絡，不過馬賽和高海寧卻指她沒有回覆，踢爆麻煩港姐講大話。
今年港姐冠軍張舒雅自參選以來可謂新聞不絕，獲獎前被踢爆她夜蒲攬仔及當街煲煙，而出身富裕的她也一直戀愛大過天，當選後不時被拍到和補習天王男友趙永康（David Chiu ）當街拍拖兼親嘴。張舒雅原本要代表香港參選下月在佛山舉行的《2009國際中華小姐競選》，但據知她患上情緒病而向無線請假及退選，日前無線承認她因病請假，故由亞軍陳倩揚頂上。
張舒雅與家人出外晚膳，原本只容納5個人的私家車竟然載了6個人。
「我冇病唔使食藥」
張舒雅小心翼翼地扶著年邁的爺爺。
昨晚張舒雅終於蒲頭，約6點45分坐著由爸爸駕駛的平治房車離開九龍塘寓所，車上還有她哥哥、妹妹、媽媽及爺爺一行共6人，超載擠在只能坐5人的房車中。張舒雅一家人到尖沙嘴美麗華商場的香港老飯店晚膳，一身粉紅便服打扮、頭載帽子的張舒雅和哥哥扶著爺爺落車，當記者上前追訪她時，化上淡妝的她禮貌地說：「一陣先答。」但期間見張舒雅不停用手提電話打短訊，現場未見她男友，張舒雅表示他要工作，記者指星期日都要返工？張舒雅精靈地說：「你哋都要返工啦。」當張舒雅安頓好家人之後，便到飯店門口接受訪問，精神不錯的她，被問到是否有情緒病時說：「我冇病，唔使食藥，醫生只係話我疲勞過度要休息，可能我未做過嘢，唔慣工作咁緊逼，所以負擔唔到。我同無線請咗3個星期假，公司都好明白，我同公司關係冇問題。」但問到未能履行港姐職責會否考慮放棄后冠，她則拒絕回答。
馬賽指未收SMS
馬賽（左）和高海寧昨日表示曾傳短訊給張舒雅，但不獲回覆。
不過張舒雅直認未能參加國際性選美覺得很可惜，而她更自稱有跟其他佳麗SMS 聯絡，不過昨日季軍馬賽和高海寧出席活動時卻間接踢爆張舒雅講大話，兩人說：「我哋聽過張舒雅只係唔舒服，佢有睇醫生同有報告，我哋都有SMS 畀佢，不過可能休息緊，所以最後佢都冇回覆。」對於張舒雅自稱疲勞過度而請假，無線外事部副總監曾醒明昨回應說：「佢畀醫生紙公司，係話唔適宜操勞同受壓力，我哋亦畀專業醫務人員睇過，公司都要接受。」
無線暫不派工作
對於雪藏張舒雅傳聞，曾醒明否認說：「冇啲咁嘅事，畀唔畀工作佢做，都要視乎佢健康狀況，等佢多啲休息、恢復正常狀態之後，公司先再考慮適當工作畀佢。」採訪：何永寧 攝影：娛樂突發組
以健康理由退選下月中華小姐的張舒雅昨日終於現身，見她精神不俗，完全不似有病。
FROM:頻果日報
