新一屆亞洲小姐剛選出，昨日卻鬧出亞視要重新徹查三甲賽果事件。羅霖之前一直炮轟網上票選的評選方法，容易造馬作弊，有先見之明的她，得悉事件後，勞氣指摘亞視高層嗱嚟搞，又指若然重選，更加不公平，仲衰過造馬！
新一屆亞洲小姐剛出爐，全球網上投票得出結果，由姚佳雯得雙料冠軍，顏子菲亞軍，台灣代表賴琳恩第三，本來塵埃落定，亞視昨日卻突然宣佈三甲賽果與投票結果不符而徹查。
影響公信力
姚佳雯當日高票當選雙料亞姐冠軍。 資料圖片
91年亞姐冠軍羅霖在亞姐選舉期間，一直批評網上票選的評選方法，指此法容易造馬，選民投票也只會著眼身材、樣貌，更稱「只睇個胸大就投票」。羅霖昨日一聽聞亞視高層指亞姐賽果有問題，即時反應很大，她說：「吓！搞嘢呀？咁似製造新聞？所以我一早話嗱嚟搞，我一早提話一半網上，一半評判最好，淨係網上（投票）容易造馬，我都話肯定有人買票。」問羅霖今次亞視提出調查亞姐賽果，會否令選舉失去公信力？她說：「係呀，而家選完出嚟咪算咋，多此一舉，我現場睇，我哋歷屆亞姐都喺度，冠亞軍都好有實力，談吐答問題都好好，我覺得靚過港姐添。咁你用咗呢個機制，就唔好話有問題咋，我一直反對就係咁，評判分數係大家擺出嚟睇，差幾多分，好清楚，網上就冇咁，搞咁多嘢，唔知係咪想宣傳。」
唔會再幫手
羅霖之前亮相亞姐宣傳，一直炮轟今屆無評判的評選方法。
羅霖十分勞氣，又表示即使重選都不會幫手，她說：「梗係唔幫啦，冇佢咁好氣，佢咁煩，之前又唔聽人講，搵嚟搞，我哋今年歷屆亞姐出嚟，都係想搞好件事，我哋一直好想保護亞姐形象，所以都叫黎燕珊搞番『仁美清聚』，幫社會做啲事。港姐今年都好多負面新聞，我哋都唔想咁，你話重選，更加唔公平，仲衰過造馬，
時間
精神
心機，如果佢話個台蝕錢，更加應該做好佢，畀精神做好啲節目，唔好搞咁多嘢。」採訪：林妙萍
陳煒：點解要將醜事揚出嚟
亞視執行主席張永霖昨日召開記者會，指亞姐賽果有問題，暗示賽果有造馬之嫌，當晚有份親臨現場欣賞整個比賽過程的歷屆亞姐，包括黎燕珊及陳煒異口同聲力撐出爐的冠軍姚佳雯、亞軍顏子菲和季軍賴琳恩得獎實至名歸，又恐高層指賽果有問題會影響公信力。
黎燕珊：我覺得今屆亞姐造馬成份唔高，或者呢次冇評判，由觀眾全民投票，呢個投票方法太新穎，可能大家未適應到，但呢個新計分方法都幾好。我近日聽人講王維基問袁小曼胸部真偽問題，我覺得身為公司高層，咁樣講嘢太輕佻。
陳煒：我諗張永霖指亞姐賽果出問題，未必同王維基問袁小曼假胸事件有關。今年我有喺現場睇選美，三甲好實至名歸，仲靚過港姐，好唔明點解亞視既然話賽果內部出現問題，咁咪內部解決咋，點解要將件醜事揚出嚟。
張文慈：我唔覺得今年亞姐賽果有問題，反而覺得三甲都特別出眾。亞視若然推翻賽果，會失去公信力。
呂晶晶：今年亞姐三甲全部係我嘅心水，歷屆亞姐係有評判，其實由評判選出嚟，都好難講係最靚，審美標準各花入各眼，不過，一旦賽果要更改，必定會有佳麗唔開心。
王賢誌：記得當晚我哋做亞姐司儀，係宣佈前先接到信封，票數同螢幕打出嚟嘅一樣，張永霖話賽果有問題，呢次係由霍震霆負責監票，咁要問番霍生，但推翻咗賽果咁又點，亞視呢個決定好令我莫名其妙，我係好認同出爐三甲係實至名歸，三人表現都大方得體。
宮雪花：睇到新聞話亞視執行主席張永霖質疑亞姐賽果，其實今屆三甲都好突出，外間都好接受佢哋，反對聲音最少。偏偏而家高層出嚟話要徹查賽果，多一事不如少一事，公司有呢個行動，一定有佢嘅道理同諗法，或者新班子真係有佢哋嘅一番作為。
何傲兒：選美評分系統應該有高透明度，好似無線咁公平、公正、公開，如果過樣嘢唔係屬於自己都要接受。
譚小環：為選美會公平起見點票要審慎，我對友台選美唔太留意，但呢啲出錯最好唔好，會令得獎者好失望，應該開會檢討吓，以免出年再有同樣情況。
2008亞洲小姐三甲，分別是冠軍（中）姚佳雯、亞軍（左）顏子菲及季軍（右）賴琳恩。
