鄭融05年因為衰煲煙及傳緋聞而被公司一度雪藏，聲言戒煙後解凍，去年她再被拍得媾仔煲煙照後，口口聲聲戒煙，原來又是講一套做一套。前晚鄭融與商台DJ Mini 蒲吧，其間她煙癮大發，吞雲吐霧，當得悉被記者拍照後還硬著頭皮講數，但早知今日，又何必當初？
曾自認被拍下煲煙照是壞榜樣的鄭融，去年接受基督教刊物訪問時，聲稱因母親拿著聖經勸喻她戒煙，令她下決心搣甩煙癮，但前晚她卻被本報拍下蒲吧扯煙的照片，身為偶像歌手的她得把口，實在有損形象。前晚鄭融和商台DJ Mini 夜蒲跑馬地The Jockey 酒吧，兩女坐在角落一枱，各自點了兩杯類似果汁雞尾酒的飲品，其間她們邊煲煙邊講笑，煙癮大發的鄭融狂扯不停，但她很鬼祟，大多時候擰歪面低頭面壁噴煙。
《去年拍拖吸煙》去年本報拍得鄭融（右）和緋聞男友劉浩龍（左）同車煲煙的照片。資料圖片
《前晚吞雲吐霧》曾發表戒煙宣言的鄭融前晚夜蒲煲煙，嘟起嘴唇吞雲吐霧。
驚青講數
未幾，一名外籍男士上前向鄭融搭訕，鄭融相當受落，越講越興奮，外籍男士離開後她依然情緒高漲，一時疏忽面向門外嘟嘴噴煙，碰巧與場外記者四目交投，鄭融當堂嚇得魂飛魄散，火速收起香煙及枱上的煙灰缸，緊張地衝出酒吧欲向記者查問，不知就里的Mini 急趕尾隨，鄭融見狀又拉她折返酒吧，二人坐下後一臉憂愁，靜默片刻後才傾了幾句，再齊出店外跟記者講數。強裝笑顏的鄭融一輪嘴狂問記者：「你點知我哋喺度㗎？係咪有人放風呀？你幾時嚟㗎？嚟咗幾耐呀？」她又問了十多次：「你影咗啲乜呀？畀我望吓呀……」表現緊張的鄭融和Mini 像唱雙簧般向記者問足半小時，其實鄭融自知被拍下煲煙照，死撐也無補於事，倒不如的起心肝戒煙！
《火機露餡》鄭融和商台DJ Mini （左）蒲吧時，枱面上放有打火機（箭嘴示）。
《洋漢搭訕》外籍男士（左）向鄭融搭訕，她不知幾受落。
無煙大使
早於05年，鄭融因與緋聞男友劉浩龍拍拖而無心事業及衰煲煙，曾被唱片公司掟入雪櫃，半年後戒煙獲解凍，一度擔任無煙大使。去年8月本報卻拍得她與劉浩龍同坐車廂煲煙，當時再度公開表明戒煙的鄭融說：「我決定唔會俾人影到呢啲食煙相，避得一時避唔到一世，我唔食都得。」說得理直氣壯，可惜齋
，根本言行不一。採訪、攝影：娛樂突發組
鄭融自知煲煙斷正後，惟有強裝笑顏遮掩緊張神色，但恐怕她今次又要面臨被公司照肺。
