亞視現任行政總裁王維基、執行主席張永霖入主唔夠一個星期，即刻大開殺戒，搞到人心惶惶。送走4位高層後，王維基為穩定軍心，之前開咗個員工大會，佢話會畀個快樂聖誕新年所有剩低嘅員工，換言之，無情刀就算要出鞘，都應該會等到過咗年先見血！
岩岩卸任嘅張家瑩（右圖）話亞視唔拍劇令佢好失望，不過佢個師妹姚佳雯就話益咗佢，因為佢唔鍾意拍劇。
腰斬婦女節目
王維基（左）同張永霖等高層，應承畀亞視員工過快樂聖誕同新年，希望可以穩定軍心。
亞視講到明話唔會再開拍劇集，又話要腰斬婦女節目，噚日《師奶你好嘢》拍攝廠景，有份主持呢個節目嘅黎燕珊話：「我就未收到通知，應該係暫時停，可能係改形式，改革未必唔好，不過希望新領導班子可以盡快解除員工嘅憂慮，因為真係太多憂慮，士氣唔多唔少受影響，公司入面大家都好靜，我係基本演員，都係會等公司安排。」對於傳亞視會再裁員，珊姐就話：「冇聽過，大家都唔敢出聲。」不過，據知《師奶你好嘢》雖然唔係即時腰斬，但係只會播到今年年尾。
家瑩驚冇得撈
另外一班得獎亞姐噚日去北角珠寶贊助商領獎，冠軍姚佳雯提到新老闆王維基話以後唔會再拍劇，佢就話益咗自己，因為自己想做主持多啲，自己就最欣賞鄭裕玲同朱慧珊。至於上屆亞姐冠軍張家瑩卸任就可能冇得撈，佢話自己仲有一年約，希望經過呢個調整期之後一切都會穩定番。
亞姐大師姐黎燕珊希望新領導班子，可以解除員工嘅憂慮。
