熊黛林（Lynn ）呢排要做電影《葉問》宣傳，每次出嚟都俾記者追問同郭富城嘅緋聞，聽聞話電影公司唔多高興，噚日阿Lynn 同甄子丹喺鑽石山做電影宣傳，提到佢早幾日同城城前後腳一齊喺機場出現，但之前喺城城去台灣宣傳演唱會時，又被指同《殺人犯》主角張鈞甯一齊去食麻辣火鍋，城城對張鈞甯仲好有好感，阿Lynn 聽後睩大眼反問：「即係點？」問佢唔呷醋咩？阿Lynn 話：「又唔係我嘅事，我諗唔關我事。」
熊黛林噚日喺香港宣傳新片，而城城（左圖）就喺上海出席手錶活動，各有各忙。
只想努力拍戲
甄子丹即場教小朋友耍詠春拳。
講唔夠兩句，電影公司宣傳部啲人已經係側邊猛話有冇關於電影問題要問阿Lynn ，如果冇嘅話，阿Lynn 就要準備上台。咁即係話佢講電影話題就好得閒，講私人嘢就變到好忙。喺阿Lynn 俾人拉走前，即刻再問佢係咪私人嘢唔答？阿Lynn 好客氣咁話：「想讀者睇到我好努力拍戲，有進步，唔係講無謂嘢！」至於城城噚日就喺上海出席手錶宣傳活動，傳媒當然都唔放過佢，問到近來好多人結婚，問城城有冇結婚衝動？佢話：「我諗每個男人到某個年齡都會想結婚，尤其我係單身，不過我一日未有達成夢想，我都唔會諗結婚，而家我同工作談戀愛。」
熊黛林玩遊戲時好落力，烏低身差啲走光都唔多理。
