當年為避前夫絕跡影壇女人斟：劉美君「我成日亂去愛」
劉美君近20年沒拍戲，至最近接拍新片飾演妓女，竟一擊即中獲提名金馬影后，自嘲蠢蛋一名的劉美君笑言是傻人有傻福。不過，她在愛情路上就未能傻得有福氣，這位快滿44歲的潮媽，當年與首任導演丈夫黃泰來離婚後，為劃清界線而絕跡影壇，兩個月前她更親證二度離婚，難得她繼續感情open ，只是學精了一件事：以後咪亂愛。 撰文：朱倬誼
「感情要學精啲」
劉美君經歷了兩次婚姻失敗，以為她對愛情滿有陰影，原來她依然享受戀愛，且對拍拖無任歡迎，她日前接受訪問時說：「我嘅感情係open 嘅，但要學精啲。我喺愛情同處事上都好蠢，不過最有福氣嘅係樂觀單純，好似BB 咁，跌親喊餐死，但好快又嘻嘻笑番，傻有傻福咋。我係人馬座，極樂於有愛情，但我成日亂去愛，性格改唔到，我睇嘢好簡單，我覺得愛就係愛，感覺到有就有，順其自然咋。」
「不嬲都有追求者」
劉美君與第一任丈夫黃泰來離婚多年，再見亦是朋友。 《壹週刊》圖片
劉美君和黃泰來離婚後，與第二任圈外丈夫移居美國，可惜婚姻只維持了6年。她稱與兩位前夫分開的原因都是性格不合，「好多嘢唔能夠勉強，我係人馬座，個人nice ，你明明睇到好多缺點……用買衫做譬喻啦，你見到件衫個款好鍾意，但個碼大咗唔稱身，算啦，就一就啦，會諗點樣遷就，冇諗過根本唔係你件衫；呢個人好好呀，被感動、投入愛過一剎那，純粹講感覺。而家學識件衫無謂大改，唔好買啦，改咗都唔係過個款。以我兩次婚姻同談戀愛嘅男朋友里面，適當嘅遷就當然可以，大嘅遷就唔work 咋，好多嘢忍得一時唔忍得一世。不過我每次都係和平分開，每個ex 都係我嘅好朋友。」所以她入圍金馬獎，也接到兩位前夫來電恭賀。問劉美君現時有否追求者？她直認說：「其實不嬲都有，我由細到大，睇相佬成日話我有桃花眼，但未有遇到有好大感覺嘅對象。」
「跌咗可以起番身」
潮媽劉美君向來以型為先，擺甫士都要型過人。
劉美君童星出身，但拍片量有限，九十年代她甚至與電影絕緣，到今天她終於道出原因，原來正是跟前夫有關，她說：「我中間點解離開電影，係因為我同第一任丈夫（黃泰來）分開後，好想同佢劃清界線，唔想喺電影出現，只想專注唱歌，所以推吓推吓冇人搵。咁多年後拍番發覺原來好鍾意做戲，好有戲癮，但要遇岩過team 人，邱禮濤可以話重燃我演戲嘅火燄。」劉美君離婚後再出山，曾遠離娛樂圈的她回流後並未脫節，又出碟又開騷又拍電影，是單身中年女人典範，難怪兒女都為媽咪驕傲，她笑說：「跌咗可以起番身，損咗係會有個焦，長時間始終會退。我好樂觀，又係幸運兒，而家傾緊劇本，TVB 仲對我好好，我冇簽約都同我拍音樂特輯，遇上好多人扶助我。」
秋生家輝教做妓女
在新片中飾演妓女的劉美君，與黃秋生有不少對手戲。 《我不賣身．我賣子宮》劇照
劉美君上一套電影是89年的《法中情》，相隔近20年到最近接演邱禮濤執導的《我不賣身．我賣子宮》，盡棄潮媽歌星形象，飾演沉淪毒海的妓女，蓬頭垢面、一棚煙屎牙，結果爆冷獲提名今屆金馬獎最佳女主角，與林嘉欣、中法混血兒張榕容和內地女星莫小奇爭影后。劉美君指入圍「意外到震」，難怪問她有否信心捧獎，她想也不想說：「我唔會去諗，提名已經係嗱咗獎，真係有得嗱就勁大驚喜，會彈吓彈吓過隻。」
勁敵只識林嘉欣
劉美君早前開騷，邀老友梁家輝上台跳辣舞。 資料圖片
林嘉欣可算是劉美君勁敵，不過長年在美國生活的劉美君只看西片，故她只看過林嘉欣早年作品《男人四十》，其餘兩位提名女星，她甚至不知她們是誰，「我只係識林嘉欣，拍戲經驗佢一定比我多。我今次賺晒喇，咁耐唔拍戲，但套戲上上下下嘅人對我嘅鼓勵，我係賺到可以分番出嚟，所以我好感恩。」由靚媽變流鶯，劉美君直言接拍前確有心理掙扎，其實她拍《我》片有段古，全靠邱禮濤苦等她3年，劉美君笑說：「之前我好擔心，自己做呢套戲得唔得㗎？邱禮濤05年已經同我提過呢部戲，只係後來我返美國，冇開到，但佢好固執屬意我，3年後個位仲丟空，佢對我好有信心，因為咁迫使我為演繹做好多功課。」這次劉美君為藝術犧牲做妓女，也多得梁家輝和黃秋生兩位影帝過料，她說：「梁家輝話你要諗吓歷代以嚟除咗葉德嫻（在電影《法外情》系列中飾演妓女），仲有邊個超越到佢？近年啲係吳君如嘅《金雞》。佢分析得好岩，要諗演繹方法唔可以同佢哋一樣。我記得拍呢套戲，最驚過場係講我喺涼茶舖，有記者問我身世，係一take 過OK ，跟住秋生喺後面拍手掌。我真係要錫佢一千啖，真好、假好，佢畀我好大信心，對我讚不絕口，跟住每場戲我都好畀心機演。我創造角色要多謝梁家輝，到拍攝時秋生引導我，有好大啟發。」
煙屎牙套刮損肉
為配合角色，劉美君做了很多資料搜集，她說：「唔化妝仲要畫黑眼圈，整棚煙屎牙，著埋cheap 高跟鞋，成腳黐晒膠布，好好笑又好悲涼，棚牙係個套，面層凹凸，仲整損晒牙肉。戲入面我要接客，做呢行係除褲唔除衫，所以唔會有乜嘢情慾戲。開戲前，我見過真嘅性工作者，佢哋好細個就做呢行，對呢個世界冇認識，所以我嘅角色嘅世界都係好單一，但佢係個好有愛心嘅人，只係每個人嘅生存技巧唔同。大家都係人，每一行嘅人都有感情，都有感性一面嘅。」
劉美君未被兩度婚姻失敗嚇怕，反而樂於繼續做個等愛的女人。 攝影：陳慧安
專訪 劉美君
