姚樂怡最錫既旗下藝人係翻版楊怡余曉彤（Hidy ），做訪問當日姚樂怡就叫埋余曉彤即場練舞，其間姚樂怡係旁邊金睛火眼睇到實，仲話：「慢慢跳啦，唔使心急，抽好件衫先！」又幾細心喎！係TVB 做三、四線姐仔出名難撈，做慣撈女二奶角色入晒格，想轉型更加有難度。
30歲既姚樂怡就係最佳人辦，入行10年做親唔係二奶就係邪牌，不過佢醒喎，搵到個經理人撈下，湊女度橋搞活動親力親為，實行學做金牌經理人霍汶希（Mani ），係就係辛苦左，好過係大台
多十年啦！
好辛苦
喎！真實對白
模特兒出身，姚樂怡入行後被TVB 安排與梁雪湄、任港秀等8個女仔組成「電波少女」，入行已經係波女，當年又唔興𡃁模，之後拍劇條路諗到唔多好行，姚樂怡亦坦言：「我做咗TVB 咁多年，唔係要爆騷，但我都想有得發揮㗎，但係嘅劇本一直都唔岩我！不過冇TVB 就冇人識我，好矛盾！」
水喺師姐
98年電波少女出道，姚樂怡便經常以36D 驕人上圍做賣點，早過趙碩之10年，不過當年𡃁模冇乜市場，否則應該可以出水喺寫真。
12月底便約滿TVB ，姚樂怡最後一套劇集係岩岩播完套《與敵同行》，飾演羅樂林情婦。「TVB 有搵我續約，不過我做厭咗，決定轉行。」
Race 揸手
眨吓眼撈足10年，姚樂怡再矛盾都要搵定後路，上年開始轉咗去香港星娛樂公司及老友記電影創作室做公關總監，旗下有2R 嘅黃婉伶（Race ）同有翻版楊怡之稱嘅余曉彤，未算係紅星不過總算有好開始，姚樂怡好自信話：「我同Mani 傾過吓偈，不過唔係太熟，我距離Mani 級數仲差好遠，仲有排學，雖然唔似Mani 咁有一大班仔女，但我而家每個月都有穩定收入，唔拍劇都夠食嘅。」
而Mani 就畀貼士話：「由藝人變經理人，要180度改變，以前乜都有人幫，而家就要幫番artist 跟到足，不過做過藝人會喺數嘅。」係囉，慢慢學實有進步嘅！
親力親為
翻牌楊怡余曉彤拍宣傳照片，姚樂怡好緊張，連佢件衫鬆少少都幫佢夾好免走光。
教擺甫士
A 貨周杰倫Cliff （左）都係姚樂怡旗下藝人，拍宣傳照扮周董彈結他，姚樂怡就喺旁邊教佢點擺先型仔，好認真吓㗎！
排滿工作
姚樂怡要負責湊藝人、搞活動、搵贊助、接廣告，瓣瓣關佢事幾乎一腳踢。身後告示板係嚟緊一個月佢搞嘅活動，姚樂怡就話海嘯都唔使驚：「老細岩岩先話唔使驚，我哋嘅job 排到下年3月，仲會開四套戲……」拍晒心口。
林祖輝早前帶旗下「四葉女」龔嘉欣同關婉珊出席活動，林喺背後執頭執尾，唔再搶鏡。《壹週刊》圖片
林祖輝湊四葉女
除姚樂怡外，做開主持嘅林祖輝，同老婆姚嘉妮結婚後去咗東亞衛視電視台做創作總監，今年年中起亦轉行做TVB 藝員部助理藝員經理，成功轉型。經常帶住「四葉女」龔嘉欣、關婉珊同王淑玲出席活動，家陣退居幕後兼修讀媒體管理碩士課程，好上進。不過林經理就堅持低調拒訪問：「我冇時間做喇！」
失蹤電波中女
98年無線為咗撼當年來勢洶洶嘅亞洲小姐，於是臨時搵咗班少女喺泳衣同曾志偉玩遊戲，之後被人投訴話過分賣肉，再改名做「愛心少女」，事隔10年，呢批電波中女有人收山嫁人，有嘅繼續喺娛圈碌！
《蘋果日報》圖片
圖左至右
1.梁珮盈
98年落選港姐，04年嫁雜誌副總編輯尹光輝，（無線前體育新聞報道員尹錦輝胞弟），生埋仔做少奶奶。
2.翟佩雲
「電波少女」後，翟佩雲冇簽無線，其間拍咗幾套包括王晶執導的電影，04年起轉做化妝師，退出娛樂圈。
3.雷穎怡
98年擔任無線世界妹後加入「電波少女」，04年參演過《鑑證實錄》，現已退出電視圈，間中接街坊騷做司儀。
4.梁雪湄
「電波少女」後冇乜代表作，最出位係05年傳同李嘉欣爭過養和眼科名醫做男友，現為亞視藝員。5.李思蓓
現為漢傳媒集團藝人，肯露肯搏是王晶電影愛將，又以部頭形式演亞視劇集，近作係亞視今年出街套《火蝴蝶》。
6.任港秀
最出位係02年陪生大孖瘡的羅兆輝同遊巴黎，近年加入基督教機構工作，不時出席影音使團活動，最近傳同爛gag 王高皓正拍拖。
7.汪琳
早前轉往內地拍劇，今年初結婚，年中回巢返無線拍徐子珊主演套《杏林心處》，繼續做大茄。
8.姚樂怡
轉行做經理人。
