敏妮Talk：學問

敏妮Talk ：學問
  

自從雷曼迷你債券事件之後，好多人都有唔同立場，銀行成為眾矢之的，但亦有人認為要尊重合約精神。不過，現實世界好難為正邪定分界，反而敏妮呢排喺幾位前輩口中，不約而同聽到一句忠告說話──就係學懂問問題。一位教經濟嘅大學教授問敏妮，知唔知何為education ？字面解，education 就係教育，教授話同一條問題，佢試過用嚟問世界名牌大學嘅professor ，得到嘅答案係將知識傳授，教授並唔滿意呢個答案。佢認為，education 真正意義係創造知識，而創造知識嘅過程就係不斷發問。

智慧根源從此起
又一次證明中國人智慧，中國人老早就已經參透追求知識就係「學問」，「學」懂點樣「問」，先至係智慧嘅根源。同敏妮一齊share 呢個地盤嘅Simon sir 李兆波，之前曾經提議，讀者聽到銀行職員推薦投資產品時，錄音甚至錄影整個情況之餘，最緊要不斷問問題。取易不取難，當你不斷發問，除咗令自己了解買啲乜，亦可以令銀行職員知道你並唔易氹。諗得偉大啲，你不斷發問，其實亦可以令個職員反思，究竟佢知唔知自己sell 緊啲乜。要知道，投資產品推陳出新，莫講話銀行從業員，就算好多投資老手都唔知背後風險，如果唔係點會咁多上市公司、富豪都出事。

亂世更要識得問
除咗個人投資理財要懂得問，家陣金融經濟世界亂七八糟，學懂問人問自己，亦可以提升自己嘅知識層面。敏妮就曾經試過因為一條愚蠢問題，令自己失分，不過，敏妮亦試過因為一條聰明問題，令人家對敏妮嘅印象大為改觀。學懂去問，可能係今次海嘯畀投資者最大嘅啟示。溫敏妮http://wanmanli.com/blogs/