前幾日睇到一段新聞報道，講樓市大跌，好多區嘅樓都無一倖免，但有人愁亦有人歡喜，好似九龍塘呢個傳統名校網，據報道講，樓價跌咗三成，結果多咗家長睇樓。報道提咗一個例子，話某個九龍塘區豪宅盤，原本賣千五萬，家陣叫價1000萬銀，減咗三成幾。代理講，而家過區嘅樓可以低到三幾百萬，的確吸引唔少以前冇諗過可以喺過區買樓嘅家長。
一擲千金全為子女
同公司啲同事傾開呢個報道，大家嘅注意力都係樓價仲有冇得跌？家陣入市會唔會仲未係時機？不過敏妮覺得，更加值得討論嘅係，前一年，市況好經濟好時，好多家長不惜一擲千金，喺名校網度買樓，都係為咗啲仔女可以入名校嘅機會大啲。敏妮仲聽聞，有啲家長自己本身已經有層樓，但都喺呢個名校網度再買多層，方便仔女返學放學。呢啲咁有實力嘅投資者，唔少係廠家，但一場金融海嘯，銀行閂水喉，搞到廠家周轉唔到，加上聽鄰版因念講，大陸推嘅勞動法，搞到廠家雪上加霜。就算班廠家捱得住唔使執，都撐得好辛苦。敏妮問過公司啲有仔女嘅同事，小朋友讀名校嘅開支認真唔講得笑，學費加埋其他雜費，一萬幾千唔少得。一個小朋友1個月1萬蚊計，1年要12萬，兩個小朋友就double 上。
免費教育面對現實
香港有9年免費教育，好市就話十幾萬唔緊要啫，但當經濟逆轉時，面對現實喺一般學校讀書，一樣可以學到嘢，但家長就慳番一年十幾萬開支。不過，講到要個仔女退學轉校，似乎係最後幾步，但賣咗名校網層貴價樓，轉買為租，或者轉去其他地區住，叫啲仔女搭程車返學，都唔係好過份。相信呢個就係點解名校網嘅樓價跌咁多嘅原因。溫敏妮http://wanmanli.com/blogs/
九龍塘名校網樓價跌，吸引唔少望子成龍嘅家長睇樓。資料圖片
from
http://appledaily.atnext. ... art_id=12094617
