周汶錡海嘯價買樓當嫁妝
近日金融海嘯，各行各業緊縮開支，市道不景，有藝人大嘆難搵食，但也有人準備投資趁低吸納，其中名模周汶錡不愁工作量之餘，並睇準樓市下跌，趁機執平貨。她已看中西半山千萬豪宅，準備置業後隨時嫁法籍男友。
慈善節目《保良局130善心匯聚星輝夜》前晚在會展拜神及錄影，出席嘉賓有周汶錡、黃宗澤和賈曉晨（JJ ）等。周汶錡一身黃色谷胸性感晚裝亮相，襯以名牌DILYS 珠寶鑽飾頸鏈及耳環，她又示範了一套翡翠，用作慈善拍賣。
周汶錡（右一）在保良局慈善晚宴上性感打扮吸引力十足，龐維仁前妻黃美儀（左一）也有赴會。
黃宗澤在海嘯中絲毫未受影響，工作多到要推掉，前晚他在保良局晚宴上獻唱。
穩陣派買藍籌
自金融海嘯後，不少公司也開源節流，模特兒行業也受影響，工作量也相繼減少，不過對周汶錡而言卻未受影響，她說：「我啲工作量冇減到，收入好穩定，反而多咗，因為生意唔好仲多咗客要宣傳。我係保守穩陣派，投資上冇失利，我都係買藍籌中國人壽過啲。」對於嚫模界如「邦民女」羅凱珊（Kama ）膽粗粗表示會趁低吸納，周汶錡說：「我係長線投資，不過有錢會揀買樓，而家係置業嘅好時機，因為我從未試過買樓，我想喺港島區西半山買1,000呎嘅樓，以前要成千萬，我諗遲啲800萬有得諗，而家係逆市投資嘅好時機，自己有物業，有乜事點都有得住
，如果唔夠錢可以同妹妹（周麗淇）夾錢買。」記者笑問周汶錡是否已經與其法籍男友同居？她說：「我同妹妹住，其實我鍾意自己住，因為有多啲私人空間。」問她置業是否想和男友拉埋天窗？她說：「未結住，我一定會結婚，我都盼望中，希望在明天啦！」
JJ 炒股賺三倍
面對金融海嘯，黃宗澤卻未受影響，還推掉一些工作，因他在聖誕及農曆新年均要在海外工作，他說：「如果有錢會買樓保值，不過之前投資賬面已蝕咗三分之一嘅錢，但係樓價跌咗，希望有機會置業，我會睇定啲先。」此外，JJ 早前在朋友協助下，投資股票大有斬獲，賺了三倍錢，由於她有買基金，故有蝕有賺，她說：「其實我都想買樓，不過要儲吓錢先，朋友話明年樓價會跌，我好矛盾，想個樓市跌，但係咁會令經濟唔好。」採訪：何慧斯、林妃 攝影：陳慧安
JJ 和高皓正拖手演出，她於後台拍照時不慎露黑底（左圖）。
周汶錡谷胸現身艷壓全場，怪不得大受客戶歡迎，工作量未受海嘯影響。
