逆市求生 陳志雲拖崔建邦搲廣告TVB 推150藝員陪笑拉客
金融海嘯衝擊下，本地各大小企業裁員及結業之聲此起彼落，對無線及亞視的廣告收入自然構成影響。為力挽狂瀾吸引客戶，無線在明晚招待客戶的節目巡禮大型活動中，除加碼安排了150位小生花旦盛裝出席拉廣告客外，更安排總經理陳志雲首次夥拍愛將崔建邦擔任活動司儀，一於將二人的是非新聞擺上枱作招徠。
每年台慶前夕無線都會舉行大型節目巡禮活動，招待全港廣告客戶，透過節目預告片向廣告客戶推銷來年廣告時段，並以小生花旦來吸引客戶。不過近日金融海嘯令香港經濟大受打擊，無線來年廣告收益肯定也受影響，為了在逆境中掙扎求存，吸引客戶落廣告，無線在明晚於將軍澳電視廣播城一號錄影廠舉行的「節目巡禮2009」大型活動中，將出動150名藝員盛裝赴會幫手拉客。
往年出席節目巡禮的小生花旦只有數十人，今年將加碼至150人。資料圖片
陳豪去年已在巡禮中變身人肉佈景板，不停陪笑與客戶合照。
近年罕見當紅小生花旦盡出
明晚出席節目巡禮的小生花旦，包括佘詩曼、胡杏兒、徐子珊、陳法拉、陳豪、鄭嘉穎、夏雨、李司棋、關菊英、鍾嘉欣和林峯等，人數之多為近年罕見。除以大堆頭俊男美女陪笑吸引廣告客戶外，無線更安排總經理陳志雲夥拍愛將崔建邦擔任活動司儀，一於借二人的是非新聞大搞噱頭。記者昨日致電陳志雲求證時，他表示公司既然有此要求，能夠出一分力他定當盡力去做，陳志雲說：「其實另一位總經理鄭善強都會一齊上台，同廣告客戶見證同分享點樣喺逆境中搵商機。」至於崔建邦昨日則在電話中說：「節目巡禮係公司一個好重要嘅活動，自己未試過做巡禮司儀，今次被委以重任固然好開心，尤其係能夠同Stephen （陳志雲）合作，真係從來未試過，佢唔單止係我老細，仲係我恩師，今次第一次同佢合作，覺得幾新鮮，但自己都有少少驚，佢講嘢咁叻，我怕自己到時有啲乜嘢閃失，希望佢會就住我。」
無線安排陳志雲與愛將崔建邦（右圖）任明晚節目巡禮司儀，明顯是借二人的新聞搞噱頭。資料圖片
被擺上枱「愛將係大家畀面啫」
明晚有份參與節目巡禮的鍾嘉欣，昨日穿上露肩裝出席聖誕活動。
提到無線今次明顯有意借陳志雲與他的是非新聞搞噱頭，崔建邦說：「其實愛將呢個名詞係大家畀面講啫，希望大家睇到我嘅努力，我會用行動嚟證明畀大家睇，我有能力應付得到。」此外，每年聖誕及新年檔期，均是藝人接騷賺取外快的黃金機會，不過今年在金融海嘯衝擊下，各大小企業紛紛縮皮，導致不少藝人工作量下降。記者昨日致電無線製作資源部總監樂易玲，問到TVB 旗下藝人可有受影響時，她說：「TVB 藝員嘅工作量冇受影響，不過廣告客戶喺傾工作嘅時候，會傾得比以前更仔細，同埋考慮嘅時間亦長咗多咗。」採訪：林妃 攝影：卓寶花、王崇穎
陳豪和佘詩曼兩位無線當紅小生花旦，明晚將盛裝出席節目巡禮幫無線拉客。資料圖片
