敏妮Talk ：有錢人嘅秘密
以往生日，敏妮經常都會拖篋去旅行，今年生日照樣嗱咗幾日大假，但經濟唔好，敏妮唔敢亂使錢，留喺香港過生日，但同樣充實滿足，因為敏妮岩岩接到另一個大project ，今次要同老行尊合作。呢個年頭要喺職場上位，first impression 好緊要，單靠食老本，遲早畀老行尊紅牌趕出場，好彩有幾日假，有足夠時間做定準備。放假期間，敏妮上咗個外國網站，睇吓人哋嘅理財心得。偶然睇到一個幾吸引嘅題目──有錢人唔會講你知嘅10件事。要講晒10件事，可能要好長篇幅，揀幾件特別嘅同大家分享，試吓市場反應點先。
奢侈品寧租不買
第一件敏妮一眾姊妹朋友可能最有興趣。據一個調查發現，超過50%有錢人計劃未來12個月，租奢侈品嚟用而唔會現兜兜買，網站仲quote 咗位被訪者講，「一個Versace 袋，下一季就過時變out ，當你可以用175蚊美金去租嘅時候，點解要用3000蚊美金去買？同樣，一年中只係幾個weekends 揸幾轉嘅Ferrari ，如果可以用兩萬五美金去租，點解要用25萬美金去買？」呢個調查幾時做，敏妮唔係好清楚，所以唔知個結果係咪同金融海嘯有關，但的確好多有錢人都精打細算。可惜香港暫時只係得XX 站，淨係可以買賣二手名牌袋，冇得租！
金錢可買自由
另一件有錢人唔會講嘅事件，佢哋都認同「有錢可以買快樂。」網站引述咗一位美國企業嘅管理層講，「喺美國冇乜企業會開心得過有錢嘅企業。」相信經歷緊金融海嘯嘅大中小企業，對呢句說話感受最深。除咗有錢可以令企業「開心啲」，另一原因係，有錢人都認同，錢唔係萬能，但錢可以買到freedom ！呢句敏妮最認同。溫敏妮http://wanmanli.com/blogs/
不少奢侈品潮流一過，就遭淘汰，故有人選擇只租不買。 資料圖片
