敏妮Talk ：掉轉嚟做
屋企大廈大維修，搞到周圍烏煙瘴氣，敏妮幾位鄰居都趁機為家居大裝修，一來唔使
一筆錢請師傅搭棚；二來大維修期間，日日嘈到拆天，鄰居乘機搬去其他短租住宅單位住。敏妮本來都想趁機裝修吓屋企，既然覺得暫時仍未係時候買樓，不如將家陣住緊層樓執一執。不過，諗諗吓又似乎未係時候，敏妮經常講「逆向思維」，簡單講，即係掉轉嚟做，個個都做嘅時候，你最好避免去做，到其他人唔做時，先郁手。
逆市消費服務更佳
就以去旅行為例，家陣可能未到大家都驚飯碗不保嘅地步，但做嘢肯定比之前一兩年落力，始終由華爾街投資銀行，到屋村酒樓都執笠，其他企業就算冇事，但經濟唔好，裁員減薪節流，唔多唔少總會令打工仔擔心。呢啲時勢，為慳又好，為保住份工都好，旅行都係縮短甚至押後。不過，正如理財版之前格價，澳元、韓圜跌咗唔少，去呢啲地方玩，錢都好使啲，加上旅客少咗，佢哋更會珍惜僅有嘅客人，招呼應該會好過唔憂做嘅時候。
大孖沙趁機增持
敏妮暫時未得閒去旅行，但逆向思維就令敏妮想到，暫時唔好裝修屋企住，雖然好多人包括敏妮都想經濟快啲好番，但一場海嘯就算家陣叫做平靜落嚟，災難之後，重建仍要一段日子，嚟緊大家都會過緊日子，隨之而嚟嘅，好可能就係通脹變通縮，好多嘢都會變得比而家便宜。其實，只要睇吓一眾大孖沙近排嘅舉動，雖然唔少富豪喺呢次海嘯中損手，但近嚟都出手增持自己公司股票，跟唔跟得過就人各有志，但佢哋應最清楚自己間公司嘅情況，真金白銀增持，人棄我取，何嘗唔係逆向思維。溫敏妮http://wanmanli.com/blogs/
因澳元及韓圜勁跌，去該兩處旅行，錢都好用啲。 資料圖片
