敏妮Talk ：乜嘢係破產價？
上個禮拜尾，港股連升三日，禮拜五睇報紙，財經版頭條大大隻字港股「破產價」升返去「衰退價」。點知有朋友問：「敏妮，乜有上市公司破產咩？乜嘢係破產價、衰退價？」呢兩個「形容詞」都唔係好難理解，其實一個係睇市賬率，即係PB ，另一個就係睇市盈率，即係PE 。首先所謂嘅「破產價」係指，如果家公司破咗產，作為股東可以分得番幾多，以此作為指標，睇吓究竟係咪投資得過。要知呢個指標就要靠市賬率，因為市賬率即係股價除以賬面值。所謂嘅賬面值，用最刻薄嘅理解方法就係，佢真係有日破產，股東應該嗱得返嘅錢。
匯豐市賬率曾低於1倍
就以上個禮拜五匯豐嘅股價為例，收92蚊，市賬率1.088倍，簡單嚟形容，你用1.088蚊買返嚟嘅過個單位匯豐，賬面值1蚊。不過，喺上個禮拜初，匯豐嘅市賬率低過1倍，即係話你唔使1蚊就可以買賬面值1蚊嘅匯豐（當然匯豐賬面就緊係唔止值1蚊，所以佢嘅股價跌成點都唔會低過1蚊），呢個就係所謂嘅「破產價」！一般嚟講，銀行股市賬率都有兩倍。至於「衰退價」亦都唔難理解。投資股票其實都係睇佢前景，嚟緊會唔會賺到盤滿缽滿，投資者想用呢個因素衡量家公司係咪值得投資，主要都係睇市盈率，因為市盈率係股價除以每股盈利。
用市盈率睇前景
一家公司喺經濟衰退嘅環境下，生意自然難做，上個禮拜五，匯豐市盈率7.148倍，喺大利市機度睇到嘅PE 係歷史數據，嚟緊大家都預咗匯豐好難維持之前嘅盈利，換言之呢個市盈率會降低，以往匯豐市盈率都超過10倍，家陣股價正反映緊衰退市況，所以用衰退價嚟形容跌咗嘅股價，都幾貼切。溫敏妮http://wanmanli.com/blogs/
股民除咗睇股價，仲要留意PB 同PE 。資料圖片
