黑面走人 問到劉華有乘客在機艙見到他由法國返港，他竟黑晒面走人。
朱麗倩當了劉德華「隱形女友」廿二年，近年關係漸趨明朗化。不過，曾在演唱會話自己「做偶像派幾開心」的劉華，多年來堅守「寧俾人知，莫俾人見」的態度，將這位背後的女人收得妥妥貼貼。
而作風低調的朱麗倩，就是因為多年來守得住「隱形女友」本份，令劉華對她寵愛有加，今年更兩度與她秘遊法國度N 次蜜月。
有讀者報料，指10月18日在法國返港的頭等機艙，親眼見到劉華與朱麗倩上機。本刊求證劉華時，他一反平日談笑風生態度，黑面拒回應。
記者問劉華今年為何不用參演《翡翠歌星賀台慶》？他竟反問記者：「幾多號呀？（1號。）幾多月呀？（11月）。係咩？……阿倫做啊嘛！」電視一日播廿次廣告，佢都唔知《翡》幾時做，離譜啲掛！
活動剛開始，劉華還未接受記者訪問時，心情大靚地與許志安跳起舞來。
劉華強調自己放假冇出埠，但十月中東亞騷拍海報時，他和Sammi 都沒有出現。留意吓，佢兩個都冇擰住演唱會主題嘅面罩㗎！
據目擊者稱：「10月18日（法國時間中午一時許），我見到劉德華同佢女朋友朱麗倩前後腳上機。佢哋當日衣著好普通，唔多起眼，但因為當日機艙大部分係外國人，加上我平時都好鍾意睇八卦雜誌，所以一眼就認得出嗰個係朱麗倩，雖然佢冇化妝，但個樣好清秀。
分開坐扮唔識
「後來我八卦望多兩眼，朱麗倩竟然即刻擰歪面，避開我嘅視線。佢哋兩個唔係坐埋一齊，係隔行坐，仲成程機都冇傾過偈。喺香港機場，劉德華竟然冇嗱行李，淨係揹住個背囊急急腳出閘，朱麗倩就一個人嗱住四、五喼行李，扮到完全唔識咁。」
10月28日，劉華出席東亞演唱會記招，自爆話因為四川地震，令原定計劃於中國舉行的巡迴演唱會延至明年舉行，所以他完成十月初澳洲個唱，便有一個月假期。記者問他放假去了那里？劉華突然很不自然：「冇椗去，去邊啫，咪喺屋企。」記者問他有冇睇當時熱播的《家好月圓》大結局，他竟然扮聽唔到。有記者問他放假喺屋企有冇睇電視劇？劉華想了好幾秒才答：「……睇波囉！都有睇《珠光寶氣》，噚晚風帆贏咗嘛！」之後又此地無銀加多句︰「我周圍行吓都有好多人撞到我。」強調自己沒有離港。本刊記者問他有否出埠時，他沒有回答，更輕拍記者的手示意唔想答便走開。他離去時，記者告訴他有乘客報料，指10月18日見到他從法國飛返香港，劉華聞言即黑面走人。
靜雞雞轉機
其實今年9月中，劉華曾爆響口，話自己27號47歲生日，會於25日離開香港放假，之後便直飛澳洲開演唱會，目的是聲東擊西。據知情人士透露，劉華是10月2日在港出發飛澳洲，當他完成澳洲4、5日兩場演唱會後，翌日便與一眾工作人員返港，當日等接劉華機的歌迷等了良久，都未見偶像步出赤鱲角機場，其實當時劉華已靜雞雞，獨自轉機飛法國會朱麗倩。
劉華之所以選擇往法國旅行，不但因為這是一個浪漫的地方，深得朱麗倩喜愛，更重要是華人不多，就算兩口子拍拖行街都唔會輕易被發現。早在今年2月，亦有人目擊劉華與朱麗倩在巴黎商場Le Bon Marche 精品百貨辦退稅，當時劉華頭戴鴨舌帽，全身黑色長外套。
其實，天王拍拖都好正常，黎明與郭富城都唔介意公開，劉華以前都講過︰「呢啲係家事唔係醜事！」咁同女友遊法國，又使乜咁鬼祟！
廿二年隱形女友 邂逅拍拖
86年，既是大馬「新潮小姐」選舉季軍，又是劉華fans 的朱麗倩，來港學美容，經好友介紹邂逅劉華，兩人即拍起拖來，有傳兩人92年在加拿大結婚。《壹週刊》圖片
出入寓所
00年，本刊拍得朱麗倩在劉華加多利山寓所出入，更與劉華同用一架保母車。據知其實朱已在上址住了5年，但因為低調沒被傳媒發覺。
攜小女孩
01年4月，本刊發現朱麗倩帶一名5歲小女孩看電影。同年尾，身在大馬的朱麗倩被當地傳媒發現與5歲小女孩捧劉華演唱會。
急避記者
06年6月，朱麗倩約朋友到利園食晚飯。記者上前拍照，朱未待保母車到，便驚慌到截的士離開，而華仔司機為怕記者追車，即用保母車攔截記者的採訪車，好讓朱安全離去。
《壹週刊》圖片
低調捧場
08年，劉華1月在港舉行個唱，朱麗倩被發現於尾場出現。
婚禮洩身份
今年5月，大馬《光明日報》拍下劉華以姐夫身份，出席女友胞妹朱麗華的大馬婚宴的照片。據知席間他送上一曲〈如果有一天〉，可見他在朱家的地位。
個唱露口風
劉華在澳洲開個唱時，表現出思婚情懷，更在台上開玩笑說︰「今次巡迴騷帶了女朋友來，希望大家稱將出場的靚女為『大嫂』。」咁當然出現嘅係女dancers 。
