俄羅斯世界盃4強法國對比利時，將於周三凌晨2時在聖彼得堡舉行，雙方球員總身價合共超過18億歐元，是一場將近167億港元對決。
兩隊歷史上交鋒，法國以73戰24勝19和30負稍處下風，但在世界盃賽場上兩次保持全勝，包括1938年贏3比1、1986年贏4比2。
法國是今屆身價最高的球隊，全隊身價10.8億歐元，平均身價4600萬歐元，身價最高球員除了保羅普巴及基沙文，「忍者龜」基利安麥巴比更被視為新球王，身價無可預計。
比利時總身價7.58億歐元，在世盃4強中排第3，前鋒線三叉戟盧卡古、夏薩特及奇雲迪布尼，同樣身價高昂，兩隊球員總身價合共超過18億歐元，今仗為世盃決賽席位，一決高下。
兩軍防線都唔穩陣
經過分組賽寓賽於操，法國踏入淘汰賽即見真章，先喺16強以4:3擊敗阿根廷，上仗再以2:0輕取另一支南美勁旅烏拉圭，表現相當出色。法國主帥迪甘斯對「3基」鋒線信任有加，讓箭頭基奧特做開路先鋒，為拍檔基沙文及基利安麥巴比製造射門空位，基沙文與麥巴比於今屆各入3球，特別係基利安麥巴比嘅高速突破，往往令對手後防疲於奔命，不過法國今屆後防演出唔算太穩陣，16強對阿根廷便試過單場失3球，上仗8強能保清白身，全因烏拉圭打穩守突擊，冇咗卡雲尼效率大減，今次對手換上火力強勁嘅比利時，後防失波唔出奇。
比利時變招瓣數多
另一邊廂，比利時主帥馬天尼斯一向主張進攻足球，而且變招瓣數多，例如16強對日本落後2球嘅時候，及時將盧卡古與隊長夏薩特拉邊，引走敵方中堅，讓原本司職中場嘅奇雲迪布尼，可於中路自由上落，全面釋放佢嘅埋門及遠射能力，最終驚險反勝3:2；上仗對8強就改用費蘭尼及韋素做雙防中，再用高空轟炸，成功以2比1淘汰大熱門巴西，盡顯強大鋒力。
比利時係今屆目前為止唯一5戰全勝球隊，而且加埋轟入14球，攻擊力係4強之冠。
只不過，比利時與法國面對同樣問題，中堅高柏尼剛傷愈狀態一般，右閘梅尼亞今仗停賽，上仗代替恩歷克卡拉斯高出任左翼衞嘅查迪尼有傷，今仗上陣成疑，令防線充滿隱憂。
http://football.on.cc/cnt ... amp;whichpage=1
