敏妮Talk ：風雨同路
噚日睇報紙，話某銀行如果借按揭嘅客人未買到層樓，就唔同佢傾按揭事宜。起初敏妮諗，銀行打開門做生意，唔使用到趕客呢招。以往個客想買樓，就先去銀行估吓價，問吓做到幾多成按揭，計掂數先扑槌買。銀行好歹都會quote 個按揭rate 畀個客，就算話家吓經濟唔好，驚個客斷供，銀行大可以話之前嘅係初步按揭息率，實際要再睇埋客人經濟狀況、還款能力等，使唔使未買樓就連傾都唔傾呢？要知道，人哋落咗定買樓，但最後上唔到會，分分鐘要撻定，呢啲時勢，風險咪話唔細。
只做實力客生意
但諗深一層，銀行呢招係逼個客自己計掂數，就算銀行借唔足，佢哋都有能力畀首期，個rate 高，佢都有能力承擔，簡單講，即係個客有實力。銀行想淨係做有實力嘅客人生意。敏妮突然諗番起屋企附近某大銀行嘅display window ，有幾個大燈箱，展示幾幅大相，包括一對老夫婦、一對後生仔女、父子等嘅合照，大意係sell 呢家銀行細心兼值得信賴，係你人生夥伴、風雨同路之類。不過廣告就係咁sell ，實情銀行都係做生意，做生意都係講個信字，「信心」喺動盪嘅時代往往最受考驗，尤其呢場金融海嘯，客戶唔信銀行、銀行唔信銀行、銀行唔信客戶、客戶唔信自己嘅客戶……正所謂一次不忠，百次不容，建立信心唔係一朝一夕，一旦破壞，牽連就好廣，要再重建信心，需要嘅時間仲長。
落雨收遮求自保
銀行呢次落雨收遮，都係為自保，雖然話在商言商，但望住幾個大燈箱，乜嘢風雨同路，又真係幾令人感觸，總之作為投資者、小存戶、小市民，都係自求多福好啲！溫敏妮http://wanmanli.com/blogs/
現時有銀行要客買咗樓，先肯傾按揭。資料圖片
