噚日收市前，公司出現好大震動，因為曾低見78蚊嘅匯豐（005），無啦啦出現102蚊嘅mark 價，冇把握機會80蚊樓下撈匯豐嘅敏妮，同其他同事一樣呱呱嘈！
其實呢兩日敏妮嘅同事好似某隻乳酸飲品嘅廣告一樣，一見面就問，「你今日買咗未？」佢哋所講嘅係匯豐。敏妮知道今日開「買匯豐」呢個題目，聽日又會收到Mr.B 嘅SMS 話：「你嫌匯豐跌唔夠！」自從步入熊市，Mr.B 話敏妮變咗「黑腳」，只要喺敏妮Talk 提過嘅股份，個價一定會跌，咁敏妮要先申報利益，因為敏妮除咗月供匯豐，亦準備低撈，可惜連續兩日都miss 咗喺80蚊樓下買嘅chance ，如果今日提完匯豐之後，真係跌咁就好咯！
錯失低撈好時機80蚊樓下嘅匯豐的確吸引，尤其對幾年前開始，由匯豐80蚊開始月供嘅敏妮，今時今日儲番嚟嘅匯豐每股平均價一定高過80蚊。其實，敏妮供咗幾年股票，中間曾變節轉供過港交所（388），直至今年重投匯豐懷抱，今日又再返番去當年開始供嘅價，你都咪話唔感觸良多。
07年首次發盈警唔只供，今次仲一手過買，並唔係為咗溝淡，而係敏妮堅信匯豐唔會令人失望，要數匯豐最大鑊，應該係07年為咗Household 、家陣稱為匯豐融資勁撇賬，搞到百年基業首次發盈警。再往上數，亞洲金融風暴，匯豐股價跌到40幾蚊，咁多關都可過到，雖然話今次海嘯百年難得一遇，唔可以用之前嘅難關嚟比較，但喺呢個時勢，投資者要搵嘅唔係明日之星，而係災難下嘅survivor 。亂世求乜啫，都係求存。大難不死，先至會有後福。學股壇前輩講，80蚊樓下買，60蚊樓下掃，40蚊樓下推埋副身家落去！
溫敏妮
http://wanmanli.com/blogs/
亞洲金融風暴時，
匯豐股價曾低見40多元。
