世風日下，香港好多年前已有少女出賣肉體做援交，我哋個保安局局長李少光反而好純真，噚日喺立法會保安事務委員會會議上，議員涂謹申問佢香港援交少女問題有幾嚴重，李少光好坦白咁講，以前未聽過呢個名詞，幾個月前先知道而家啲後生女，竟然做啲咁嘅嘢。此語一出，在場人士好錯愕。
援交一詞源自日本，全名「援助交際」，即係有償拍拖，露骨啲講即係少女出賣肉體，換取吃喝玩樂同金錢，香港都有呢種情況。李少光做咗保安局一哥多年，竟然連援交少女係乜嘢都唔知，八方建議佢多啲向手下收風，或者請教社工，否則同社會脫節，又點做得好份工呢！
劉江華夫婦同場噚日會議由行會新貴劉江華以主席身份主持，咁岩佢太座穆斐文以廉政公署社區關係處處長身份出席會議，向立法會交代施政報告有關廉署未來一年嘅工作。有人話呢次應該係兩夫婦首度同場亮相，近來政界潮講「利益申報」，有冇買雷曼迷債、中信泰富股票都要從實招來，呢方面民建聯最肉緊，唔知點解劉江華兩公婆噚日卻冇申報關係？
李少光話幾個月前先知道乜
嘢係援交。
