熊黛林生日前一日行完Toppy 時裝騷講過生日願望係想城城「只要在乎我」咁高調，似乎要同另一天王嫂樂基兒看齊。
名模界同明星界一樣，搞吓緋聞、不和先可以提升身價。天王嫂熊黛林上週五（10日）牛一潛入城城屋企，過咗33個鐘先當住大批記者面前步出天王竇，明顯係想證明天王嫂身份不變；FBI 仲記得佢8月尾出口術暗示同城城分咗手，又俾人影到同成班名模喺三點式遊船河，話佢掟咗煲要「海戰」同公司男模喎，呢個世界邊有咁蹺㗎？
所以當日有份遊船河嘅名模姚書軼（Mikki ）就因為懷疑係天王嫂放料畀記者，嬲爆爆寸嘴話要做「地王嫂」。
星期一（13日）FBI 走去問Mikki 係咪嬲咗熊黛林，Mikki 繼續唔客氣開火：「有冇人放風就唔知喇，但下次同佢遊船河，我要戴番個push up bra 囉，而家輸蝕晒囉！」係囉，下次同天王嫂一齊就記住扮「行」嘅喇，實有鏡出㗎！
《蘋果日報》圖片
城城同天王嫂經常俾記者發現出雙入對，唔通次次都有人放料？《壹週刊》圖片
8月31日熊黛林同姚書軼、Angelababy 等喺大潭對開遊船河，俾雜誌擺上封面，奇在唔單只出海都有人跟到，仲惟獨熊黛林有大相，難怪俾人懷疑佢放料。《壹週刊》圖片
姚書軼又暗窒熊黛林鬼祟：「我鍾意同男友行街，匿埋屋企好悶嘛，俾人見有乜所謂啫！」
