這邊廂海洋公園的鬼屋廣告晚晚熱播，搞到家中得幾歲大的姪女都嚷著要去玩。那邊廂電影《畫皮》又大賣電視廣告，小姪兒又喊驚又想去睇。為免細路玩過/ 睇過後連場惡夢，還是不太驚嚇、有得玩又有得食的合家歡鬼屋適合他們多些，像富豪九龍酒店推出的萬聖節主題晚餐。
晚餐每席4位起，共有8道中菜，包括賣相像鬼眼，實則用蝦丸+黑水欖做成「大眼珠」、排得像骷髏和腸臟、其實是燒豬仔骨拼茄汁烏冬的「排骨精」等，整體賣相搞笑多過驚嚇，口味則著重香脆味濃，細路最愛吃了。
飲飽食醉，孩子們還可跟鬼演員拍照和玩鬼屋。到時不妨為小朋友「扮鬼」，若然被大會選中為當晚的最佳造型，仲有禮物呢。計我話，就算選不中，孩子們可以扮鬼扮馬出街已過足癮啦。
「嘩鬼襲古堡派對」萬聖節主題晚餐
地址：尖沙咀麼地道71號富豪九龍酒店2樓百樂廳
電話：23138671
日期：10月24-26，29-31日
時間：7pm-10pm
價錢：成人$280/ 位，12歲以下小童$200/ 位
排骨精 造型十足照X 光，番茄汁醬酸咪咪的，夠開胃。
亂葬崗 有芋頭做的棺材，還有反骨雞翼及炸魷魚鬚，又脆又香口。
兩個鬼演員會在當晚滿場飛，嚇人之餘也歡迎與客人合照。
負責炮製特飲的侍應都扮鬼扮馬。
