賭王四房公子、21歲的何猷君和女子組合少女標本成員、現年25歲來自內地的袁紫僑（CoCo）大前晚拍拖到海洋公園哈囉喂狂歡，被本報讀者捕獲，踢爆變身小丑的他們做足情侶攬啜親暱舉動。CoCo前日不認自己是相中人，有圖有真相，她和猷君昨先後改口承認戀情。四太梁安琪對猷君戀圈中人，她說：「可以反對咩？」
賭王何鴻燊和四太梁安琪愛兒、現年21歲的何猷君，學歷和家境都好，絕對是超級筍盤。讀者黃小姐透過本報的「爆相爆片」，分享了大前晚在海洋公園的哈囉喂，發現猷君跟女子組合少女標本成員、現年25歲的袁紫僑十指緊扣在園中狂歡。由於戀情斷正，兩人昨日終承認拍拖。
猷君與CoCo放下戒心，未有理會旁人目光。
猷君與CoCo拍拖斷正，二人最初否認，惟昨日改口承認戀情。
【小丑情侶】
CoCo與猷君化身小丑情侶，相約友人一齊扮鬼扮馬慶祝萬聖節。讀者提供圖片
CoCo和猷君不避嫌前晚分別在Ig貼相曬恩愛。
昨日是萬聖節，情侶最愛齊齊扮鬼扮馬狂歡，猷君和CoCo大前晚分別扮小丑及小丑女，兩人不避嫌在Instagram貼相曬恩愛。黃小姐指當晚在海洋公園玩撞見猷君孖CoCo全程手拖手，女方又搭住男方膊頭，猷君還伸手入CoCo外套攬實纖腰。黃小姐前日在電話中說：「我有朋友仲見到佢哋嘴對嘴錫，我就見到個女仔錫落猷君塊面。」猷君和CoCo變身後即放下戒心，盡情喪玩，卻不慎令這段姊弟戀曝光。
「啱啱發展」
猷君最初亦口密否認戀情，昨日才改口認拍拖：「啱啱發展箒，唔想咁多壓力，畀啲空間我哋。呢個女仔幾好，佢本身係國內人，我𠵱家去咗上海工作，要更加瞭解嗰度文化，工作可以傾到偈幾好，佢爹哋媽咪做投資，對我本身創業畀到意見，佢都創過業，打理過父母事業，佢又喺外國讀過書，雖然佢喺你哋眼中係藝人，但我唔係咁睇囉。」
本報前日就猷君與CoCo拍拖一事聯絡四太梁安琪，她說：「去玩啫，唱歌㗎？佢（猷君）返咗嚟放假，佢好多朋友都返咗嚟一齊去玩，Halloween嘛。」問猷君有否向她提及新戀情？四太說：「冇喎。」會反對兒子戀上圈中人嗎？她答：「可以反對咩？小朋友睇得幾耐？最緊要係事業、要創業，有事業先講。」
採訪：陳傑、羅慧敏、唐如
from:
http://hk.apple.nextmedia ... 161101/19818585
