同郭富城（右圖）狂歡完33個鐘嘅熊黛林，噚日下晝離開寓所時鬼咁風騷。
日前到郭富城屋企狂歡33小時慶祝生日嘅熊黛林，休息一日後，喺噚日下晝離開大坑寓所去尖沙嘴開工，問佢心情點時，佢好風騷咁話：「好開心好開心。」問佢同城城係咪公開戀情，佢猛話唔係，亦唔肯講城城送乜比佢做禮物。馮仁昭好奇問佢喺城城屋企30幾個鐘玩乜嘢，熊黛林竟然口窒窒咁話：「冇乜嘢玩呀。」
姚書軼話要做「地王嫂」，擺到明寸熊黛林。
句句有骨對熊黛林成為風頭躉，同公司嘅姚書軼（Mikki ）似乎有啲不是味兒，噚日佢喺馬場被問到熊黛林係咪拍拖拍得太高調，佢就話：「低調就假，少少（高調）啦，佢哋兩個鍾意咪得咋。」問佢覺得熊黛林同城城係咪拍緊拖？Mikki 話：「我諗係啦，唔係一齊30幾個鐘做乜？不過，我都戥佢開心。」問到羨唔羨慕熊黛林離開過陣有成6個保安護送，好似女王出巡咁？Mikki 話：「畀我就唔想，我最好出街冇人認得。其實我同佢唔算深交，冇乜傾心事。」熊黛林重申「天王嫂」地位，身價肯定會飆升，Mikki 就話：「我自己靠自己，一手一腳咋，天王咁少，得兩個available ，我都要做地王嫂。」真係句句有骨。噚晚同Mikki 一齊拍嘢嘅熊黛林，8點幾化晒妝出嚟，問佢有冇送番個birthday kiss 畀城城時，佢拒絕透露。
另外，城城老友張智霖噚日凌晨喺灣仔夜蒲，對於城城同女友慶祝生日，佢攤開雙手示意自己乜都唔知。
