休息咗三個月嘅佘詩曼，本周一（10月6日）再次復工，同黃子華首度合作新劇《企業醫生》，同劇仲有復出嘅李綺虹，呢個組合都算相當新鮮。
早前套劇試造型時，向來醒目嘅子華明顯怕咗姣佘，表現相當避忌。估唔到呢日正式開工，子華依然係有意冇意咁避佘。當日佢哋去咗間車仔麵店度拍攝外景，未埋位時大家順便嘆番碗麵。姣開有條路嘅阿佘，正式拍攝時本來坐李綺虹旁邊，忽然調位坐過子華身邊。
不過，子華見阿佘咁主動，佢都好識保護自己，除咗坐到離行離列拗手拗腳外，仲全程主力同李綺虹傾偈，雖然未至於當阿佘冇到，但係避忌樣就出晒嚟。咁又難怪子華咁驚嘅，同阿佘合作過嘅男拍檔，真係未有人成功脫離同佢傳緋聞嘅命運，不過睇嚟子華女友應該仲驚至真！
正式拍攝時，阿佘同李綺虹係企響度狂鬧子華（上圖）。但一停機，阿佘就撲過去同子華坐。但子華就闊佬懶理，只同李綺虹social 。
子華盡量貼窗坐之餘，仲不時側身將隻手擱響椅背，以避嫌疑。
兩人冇偈傾，子華索性撩企響窗門外睇拍戲嘅細路玩。阿佘今勻真係老貓燒鬚。
