早前陳法蓉暗撬陸詩韻牆腳，直認與「油王」朱明拍拖後，油王對佢寵愛有加。九月十六日，陳法蓉完成美國的佈道活動返港，身為十億企業老闆的朱明親自到機場接機；翌日老友蔡少芬生日，陳法蓉更帶埋男友去示眾。
「油王」有錢又細心，陳法蓉當然要箍到實。佢仲四圍同朋友講，話打鐵趁熱，想盡快拉埋天窗做朱太。又難怪，自從陸詩韻甩拖後，收入大跌，局住賣胸接job ，連月租十萬的Apartment O 酒店式公寓亦冇得再住落去。陳法蓉前車可鑑，又點到佢唔緊張？
上周六(9月27日)，陳法蓉前往重慶，出席「憶念美9周年」慶典活動。席上有人問佢同朱明幾時拉埋天窗，她風騷地回答：「我也會嫁，但是沒這麼快，我暫時沒有結婚的打算。」
雖然陳法蓉講到好唔著緊，其實佢早已計劃逼朱明結婚。她身邊的朋友講：「Monica （陳法蓉）同朱先生只係拍咗兩三個月拖，就已經一頭中咗落去。佢成日猛讚朱生，話佢份人細心又風趣，所以要快刀斬亂麻。佢仲話：『呢個係結婚對象，我同佢propose 緊結婚嘅嘢。』連我哋叫佢睇定啲先，佢都聽唔入耳。其實佢次次拍親拖都好盲目，咩都唔理咩都唔諗，真係戥佢擔心。」
事後記者訪問蔡少芬對朱明的睇法，點知佢笑住咁扮傻：「吓，佢有嚟咩？我唔知喎！」至於陳法蓉則因為知道有記者在場，一早拖住朱明兜後門離開（下圖）。
朱明愛結交女星
又難怪陳法蓉心急要逼婚，原因係朱明喜愛結交女星，又點到佢唔擔心會步陸詩韻後塵？記者得悉，朱明經常同其他異性到IFC 的「稻菊日本料理」食飯。他出手闊綽，一餐飯食幾萬蚊面不改容，加上把口好叻識
人，故令異性們另眼相看，對佢加倍逢迎。朱明更早已成為該餐廳的VIP ，一年結帳額以百萬計。一位稻菊的常客指：「以前經常會見到佢同啲講國語嘅模特兒響度食飯，不過呢排就同啲女星一齊嚟，出名嘅又有，二三線嘅又有。佢真係好豪，成萬蚊支酒，當水咁飲，我見過佢兩個人食飯開咗三支酒，真係唔知點計數！」
另外，一名認識朱明的女藝人指：「佢帶你去shopping 任你買，買十幾廿萬都冇問題。雖然唔會有錢過手，但已經令好多女人落
啦。所以佢究竟有幾多個女朋友，可能只有佢自己先知。」
陸詩韻戰鬥格
自從冇咗條大水喉，陸詩韻近期大玩性感。出席澳門Chloe 活動時，一身火紅色低胸晚裝短到冇得再短，故頻頻走光。翌日她擔任名牌配飾專門店PLUS IT 宣傳活動的司儀時，又以超deep-V 示人，認真搏。
陸詩韻局搬
這邊廂陳法蓉煙韌蹺手，那邊廂被撬牆的陸詩韻露肉賣性感。在陳法蓉於重慶大談男友的同一日，陸詩韻前往澳門出席Chloe HELOISE 手袋的宣傳活動。當日她身穿紅色低胸超短裙，條裙更短到頻頻走光。記者問佢幾時搬，佢回答：「十月就搬啦。（咁遲先搬？）因為之前交租係一次過俾，所以遲啲先搬囉。」俾陳法蓉撬牆腳後，一切打回原形，唔知陸詩韻有冇後悔當日冇使橫手逼婚？
9月16日接機
朱明的中協集團，單是油脂業務的營業額已達十億人民幣，日里萬機的他仍在中午時段抽空來接機，可見他近來的確情傾陳法蓉。
朱明尷尬
陳法蓉離開香港一星期，參加教會前往美國的佈道活動。回港時難得朱明來接機，雖然明知有記者在場，仍十指緊扣，十分煙韌。但朱明則顯得不知所措，惟有擰歪面迴避鏡頭。
落機有助手
陳法蓉與教友韓瑪莉乘機返港，原來男友朱明已派了兩名員工到入境大堂等候。
朱明曾遭強制清盤
朱明為人十分低調，出身及背景更成謎，就連同佢交往過嘅女星，都只知佢係「紅色富豪」、揮金如土，其他卻一無所知。
不過，本刊翻查資料，發現98年他出任董事的「嘉洲公司(Kirland Ltd.)」曾遭強制清盤。而他所成立的「嘉華油脂公司」亦告解散。至後來他收購國內的國營油脂企業，成立「宜興四海油脂公司」，事業才扶搖直上，07年更被宜興市政府選為22名優秀廠長之一，認真夠「食力」。
9月15日，四海足球隊首次在甲組足球聯賽亮相，出戰傳統勁旅愉園。身為班主的他亦有到場打氣。
公司註冊處的資料顯示，朱明於98年出任嘉洲公司(Kirland Ltd.)的董事。該公司的注冊資本高達一千萬圓，最後卻面臨強制清盤。
9月17日見老死
9月17日係蔡少芬生日，當晚陳法蓉帶埋朱明，到海運大廈的「Stone Grill 」，出席蔡少芬的生日會。連老死都見埋，可見陳法蓉早視朱明為「正印」。
當晚除蔡少芬及老公張晉外，還有韓瑪莉及其他教友，咁多人，難怪朱明一副尷尷尬尬的表情。
