黎諾懿坦言拍《家好月圓》時壓力大，不過這種壓力能夠轉化成動力，令自己進步。仇志中攝
溏心風暴之家好月圓 鬥戲人辦
結局倒數仲有6日--有網民在網上說：「阿圓唔知喺度做乜？」
黎諾懿嘗試解釋，他說：「有人留意到自己唔知做乜，已經係有人留意到自己啦！」另一個解釋是角色設計，劇入面的阿圓真的不知道自己在做甚麼。
不過，從今晚開始的《溏心風暴之家好月圓》，阿圓的出場率大大增加，究竟他在做甚麼，終有分曉！ 撰文：楊潔雯
黎諾懿在劇中受飾演紅姨的米雪擺佈，不過在戲外他就很欣賞這位前輩。電視圖片
隨著阿圓跟嘉美（中）走在一起，黎諾懿的戲份也大大增多。劇照
從《溏心風暴之家好月圓》播映到現在，沒有人讚黎諾懿做得好，也沒有人彈他做得差，最多人說整齣劇沒他影蹤，日前黎諾懿接受訪問時解釋：「我知有人會問阿圓唔知去咗邊，但我覺得有人留意到我，已經係好事，好多時劇中屋企人食飯同猜枚，所有家庭樂都冇佢份，其實係想塑造佢一個孤獨孤僻嘅形象，所以成日唔見人，編劇一早同我講，佢叫我唔好唔開心，佢話個角色係咁，成日一個人唔同兄弟姊妹一齊，係要做強烈對比，所以我唔會成日同兄弟姊妹一齊食飯，又冇乜機會見面，我收工佢哋入廠，我入廠佢哋收工，我對得最多就係紅姨（米雪飾）同Jo 飽（夏雨飾）。」
每個演員都恨嗱獎，但黎諾懿不想一步登天，他想先磨練演技，然後靠實力贏取獎項。
壓力大進步快
其實阿圓並非沒戲，只是好戲在後頭，黎諾懿說：「由33集（即今晚）開始，會講阿圓俾Jo 飽逼供，講出俾紅姨利用當年佢喺泰國吸毒同揸車撞死人件事，阿圓又會同嘉美（徐子珊飾）結婚，又俾嘉美呃佢流產，原來同其他人搞大個肚，後面大家都會有機會見到我。」
《溏心風暴》到《溏心風暴之家好月圓》，黎諾懿自覺不同了，他說：「第一集比較幼嫩，唔識喊；第二集可以識得控制點喊，劇中演員個個都有番咁上下，雖然有時係好大壓力，又唔想俾人覺得你戲弱，或者狀態唔好顯得你更差，成日同自己講要一take 過，唔好連累其他人，這種壓力其實可以令人進步。」
雖然未有人批評黎諾懿做戲的好與壞，卻有人留意到他在《家好月圓》入面的長髮造型，反應一面倒——彈，他也說：「差！」但他解釋：「呢個頭髮唔係假，係特登留長，想佢搞到同其他兄弟唔同，咁樣感覺會跳出來，我覺得個頭唔好睇，但我鍾意呢個造型。」一個難得的造型，是要辛苦經營，他說：「要我留長頭髮都係一個月前嘅事，過時不停用生髮水洗頭，真係OK ，長得好快，但係得一個月，導演覺得唔夠長，要我電髮，搞到好似好鬆咁，不過我就唔鍾意。」
慢慢浸淫演技
入行五年的黎諾懿怎樣形容自己的演藝事業呢？他說：「比上不足啦，好多人要好多時間先有人賞識，我知道自己比較快俾人認得，我優點係冇殺傷力，又唔想咁極端，而家先28歲，仲有時間，我想慢慢嚟，想好似撈家（羅嘉良）同安仔（郭晉安）咁。我唔想俾人覺得負面，乞人憎，未紅前唔想有污點，等我真係有資格嗱獎時，希望每個人都會戥我開心。」
嘉美處心積慮親近阿圓，最後如她所願讓阿圓愛上自己。
搶先爆：嘉美撻著阿圓
今晚播映的第33集《溏心風暴之家好月圓》，講述嘉美（徐子珊飾）成功親近阿圓（黎諾懿飾），阿圓不理Jo 飽（夏雨飾）和
（李香琴飾）反對，聘請嘉美做私人助理。嘉美向阿圓大獻殷勤，兩人及後更公開拍拖。
紅姨（米雪飾）跟前夫油面強（李國麟飾）合謀奪取「家好月圓」的產業，Jo 飽拆穿紅姨的詭計，提出離婚，不過紅姨堅決拒絕。阿圓被委任做「家好月圓」總經理，紅姨經常以阿圓當年在泰國吸毒後駕車不小心撞死一個女子，然後賄賂當地警察一事，要脅阿圓對她言聽計從。Jo 飽迫阿圓講出做阿紅傀儡的原因，Jo 飽得悉後也無計可施，只好忍氣吞聲。
溏人心聲
最愛劇中金句「人在做天在看」
「荷媽（李司棋飾）講呢句有意思，易明又易記，又短夠精，唔需要諗咁多，其他有好多金句好難記，又難明，呢句最好，到point 。」
自選最愛場面
被逼供手震震
「最愛過場係我俾Jo 飽（夏雨飾）迫我講有乜痛腳俾紅姨（米雪飾）揸住，點解成日要聽佢話，呢場戲我有四頁紙，同Jo 飽攬住喊，拍到尾我哋兩個都手震，成個人呆晒，導演都話好好，最好就係我可以一take 過，如果第二take 我諗唔會咁好。」
表現最好演員
琴姐魄力驚人
「最好係司棋姐同琴姐（李香琴），佢哋好專業，尤其係琴姐，呢齣劇好趕，個個都冇時間休息，佢戲份又重，又有番咁上下年紀，但係仲捱得過我哋，好多時佢最多都係兩take ，司棋姐就更加唔使講。」
