陸詩韻談及男友被撬，要搬返將軍澳租平樓住時，顯得一臉無奈。
近日有報道指，陸詩韻繼上次被周汶錡搶走富豪男友曾文能後，依家又被陳法蓉出口術撬走新結識的「油王」男友朱明。在報道出街前一日，本刊問佢知否朱與陳拍拖時，佢竟然假裝不知，還緊張地反問記者：「佢哋真係拍拖咩？」
上月底，陳法蓉被傳媒影到同朱明去太古廣場掃名牌，事後陳法蓉親證對方是自己的金融界男友。那邊廂，陸詩韻卻即將要搬離月租十萬的酒店式公寓，回到將軍澳租平樓住。
金龜夢碎，又冇物業揸手，一切打回原形，真係幾悲哀。
上月廿五日，有傳媒影到朱明同陳法蓉在太古廣場掃貨，朱明負責找數。但當他發現記者影佢時，即勞氣地說：「做乜影咁多？影夠未？」更要勞煩陳法蓉氹番佢，真係冧！
今年五月陸詩韻搬進銅鑼灣豪華酒店式公寓「Apartment O 」，並被傳媒影到她與「油王」男友朱明拍拖逛超市。可是事隔不足三個月，陳法蓉即介入二人戀情，並撬走「油王」。事後鮮有談及感情事的陳法蓉，更罕有地對傳媒說：「我拍緊拖，好開心咋依家，佢係做生意嘅，好錫我。」並表示會在四年內結婚。
慳錢生活
冇人照顧，陸詩韻連日常生活都變得平民化。記者連日追訪，發現她一收工就返屋企，甚少行街，shopping 都係齋睇唔買，真係慳到爆。
打扮樸素的陸詩韻前往銅鑼灣Sole Town 試鞋。但原來佢唔係去買鞋，只係去試公司贊助佢嘅鞋咋。
試鞋時陸詩韻顯得心不在焉，莫非正想起數月前仍在名店掃貨嘅日子？
4:15pm 置完裝陸詩韻行到附近書店睇禮物卡，最後都冇買到。
4:30pm 雖然陸詩韻行咗一個鐘頭街，「戰利品」只是在家庭用品店買的三排衣架，接著便匆匆步行回家。
9月9日 3:30pm
假裝不知
男友被撬，陸詩韻本周二（9月9日）記者在Apartment O 門外向她追問陳法蓉與朱明拍拖一事時，她假裝不知，仲做戲做全套。說：「我真係唔知喎！」
記：你同Tony （朱明）拍咗拖幾耐？
陸：我哋只係朋友。
記：但之前有周刊影到你哋甜蜜行超市喎？
陸：（尷尬）已經係兩個幾月前嘅事，過咗去唔想再解釋啦。
記：係曾文能介紹你識佢嘅？
陸：（決絕）唔係！絕對同佢冇關係，係朋友介紹識嘅。
記：知唔知Tony 同陳法蓉拍拖？
陸：我真係唔知喎！如果係真嘅，我戥佢哋開心咋。
記：Tony 冇同你講過咩？
陸：我哋好耐冇見。忙完奧運就去咗馬來西亞（登台），唔舒服都冇時間睇醫生。其實我都唔知點解，影到我同其他人，就話我同呢個人一齊，而佢同其他人嘅緋聞都關我事。奧運之前我已經開始好平靜，好俾心機做嘢。
搬返將軍澳
記：聽講你就快搬？
陸：係，搬返去將軍澳過頭。
記：Budget 幾多？
陸：萬零蚊咋。雖然依家呢度（指Apartment O ）好方便，約朋友食飯最好，行出去好多嘢食。
記：咁你又搬？
陸：（諗咗一諗）但住咗呢度之後成日唔舒服，唔係頭痛就有其他小病。（風水唔好？）係呱，我以前都唔信。
記：但將軍澳啲樓同呢度差好遠喎。
陸：其實清水灣半島同維景灣畔我都幾鍾意㗎，將軍澳近我屋企，又近公司，依家只希望專注喺工作上，我唔想人哋只係留意我嘅緋聞……（從略，不停話自己好勤力工作。）
消息人士指：「朱先生同陸詩韻係今年五月左右開始拍拖嘅，咁岩陸詩韻就喺呢段時間搬咗去Apartment O 。其實朱先生一向都鍾意同圈內嘅女星玩，最近兩個月仲識埋陳法蓉，陸詩韻就愈嚟愈少見。陳法蓉就醒目呀，一埋到朱先生身，就即刻高調咁講話拍咗拖好多年，令朱先生身邊嘅其他人全部變晒第三者，你話陸詩韻可以點？」Apartment O 的租金原來最平都要八萬，冇油王照顧，陸詩韻惟有打回原形搬回將軍澳。
Apartment O 超豪
陸詩韻即將要搬離的「Apartment O 」位於銅鑼灣新寧道，屬區內最高級的酒店式公寓之一。雖然大廈外貌一般，但原來每個單位都是由設計師按照「舊上海」或「舊香港」作主題而設計，房間裝修得極之奢華。
該公寓共有十五個單位，每個單位約1,500呎，月租最平都要八萬。記者問過公寓的租務部，對方指現有一個單位即將出租，唔通就係陸詩韻過間？
睡房
客廳
Apartment O 標榜「Living with art 」，所以房間極之有格調。就連睡房及客廳的擺設都十分講究，唔係名牌就係古董。
冇樓揸手
除咗局住要搬之外，原來外表精靈的陸詩韻並不如她的死敵葉翠翠般醒目，一拍拖就要有樓揸手，幾個月換來的，原來只有短暫的豪宅生活、多個名牌手袋，以及數目不多的現金。陸詩韻今次被飛，可謂人財兩失。
「冇錯朱生佢係好豪，第一次同人去街，就任得對方掃名牌，一次過買十幾萬都面不改容。食飯又要勁有排場，成萬蚊支紅酒係咁開。佢又四圍同人講，自己離咗婚，想喺香港搵番個老婆，搞到啲女星好有憧憬。」知情者說。
本周三（9月10日），有雜誌披露陸詩韻被陳法蓉撬牆腳。記者再次訪問陸詩韻，她表示：「花邊新聞，唔想再講太多，最好嘅回應就係唔回應。（葉翠翠依家有錢有樓，你覺唔覺得自己好唔抵？）冇關係！（激動）兩件事唔可以相提並論。總之我依家好滿足自己嘅生活！（你怕唔怕呢件事令你俾公司雪藏？）公司叫我小心啲。我已經好俾心機做嘢，公司會睇得到嘅。」
翻查田土廳資料，陸詩韻名下的確沒有物業，早前她又自爆買股票坐艇，真的人財兩失，打回原形。至於陳法蓉卻在美國逍遙傳道，未能回應。
住豪宅 朱明家住中半山馬己仙峽道港景別墅，市值約六千多萬。《蘋果日報》圖片
揸靚車 平治G55AMG 四驅市值約三百萬，但這部車只是朱明眾多靚車中的其中一架。他所有車都配有一個靚車牌，非常講究。《蘋果日報》圖片
「油王」朱明起底
朱明03年從大陸來港，從事糧油生意，是中協集團有限公司的最大股東。03年他更從江蘇省宜興市購入原由市政府擁有的油脂廠，成立「宜興四海油脂公司」，並以「四海」、「喜盈盈」、「惠純」等品牌生產食油，06年的營業額高達十億人民幣。近年他更投資以乙醇發電及飲食等項目，身家豐厚。
據知他已離婚，有一個八歲大的女兒，並與香港有大陸背景的富豪相熟。
足球隊班主
今年朱明投資八百萬成立「四海足球隊」，首度參加香港甲組足球聯賽，並擔任班主。在球隊成立的記者會上，朱明以喉嚨痛為理由不肯開腔說話，可見他的作風十分低調。
香港總部
中協集團的總部位於灣仔新鴻基中心。記者曾到上址探訪，但該公司的接待員表示朱明目前不在香港。
曾文能老死
原來陸詩韻的前男友曾文能（左），是朱明（右）的老死。去年十月他們被拍到在高級意大利餐廳Da Domenico 與劉嘉玲一齊嘆紅酒美食，果真係「好兄弟」。
葉翠翠贏
05年港姐冠、亞軍葉翠翠及陸詩韻，經常被人作比較。早前葉翠翠忽然變「股神」，陸詩韻更開腔暗寸佢：「有錢、冇錢，唔需要同人講嘅。」
不過依家陸詩韻人財兩空，可能佢就會明葉翠翠嘅金句：「最緊要有錢揸手」係幾咁有道理。
打回原形
早前陸詩韻接受本刊訪問時表示，其父是製衣廠老闆，家境不俗，所以可以揸Benz 住貴樓。但記者發現，陸詩韻「忽然富貴」前只是同家人住在將軍澳廣明苑的居屋單位。
卸任兜踎
05年獲得港姐亞軍的她，卸任後工作量不多，知名度亦不高，所以一直與家人住在廣明苑。直至近日，亦間中發現她回家探望父母。
日本伴遊
07月1日，她被傳媒揭發陪「監躉富豪」曾文能同遊日本，並經常於曾文能居住的渣甸山花園出現。《壹週刊》圖片
闊太生活
自從有個富貴男友後，陸詩韻的生活亦成個闊太咁，出入揸Benz ，嗱名牌手袋，與只有萬零蚊的月薪極度不相稱。
男友被撬
08月1月，有傳媒影到曾文能與周汶錡食飯約會（圖）。至6月更傳出曾、陸甩拖的消息。但陸反而愈加富貴，並搬入月租十萬的Apartment O ，原來當時佢已冧掂另一富豪朱明。依家佢又要搬返將軍澳，可說是金龜夢一場空。《壹週刊》圖片
陳法蓉風騷美國傳道
事件的另一女主角陳法蓉（右一），原來目前與好友蔡少芬等在美國三藩市傳道。記者在蔡少芬的網誌中發現他們的合照，女主角異常風騷。
大尾篤開餐
離港前數天，記者於9月2日晚發現陳法蓉同蔡少芬、韓馬利和一班教會弟兄姊妹，到大尾篤吃泰國菜，卻不見朱明的蹤影。
搵到大「油井」，陳法蓉卻仍繼續住在沙田碧濤花園，與好友蔡少芬為鄰。記者曾到過她的單位探訪，發現只剩下她的外籍工人在家。
陳法蓉出席時裝騷時，明顯有備而來。記者未及追問，她已經自爆有新戀情。
時裝騷開始時，大會本安排陳、李二人排排坐，幸好最後有人出面調停，才避免尷尬。《蘋果日報》圖片
自爆寸嘉欣
陳法蓉同李嘉欣的「口味」一向接近，繼倪震後又有許晉亨。二人同場，當然有火花，上月27日二人在ESCADA 時裝騷上碰面，記者問李嘉欣與陳法蓉同場會否尷尬，李嘉欣寸爆咁話：「吓？呢啲係上世紀嘅事嚟個喎！」陳法蓉隨即反擊對記者說：「我都有拍拖，仲好開心添！」李嘉欣話會在四年後計劃結婚，陳法蓉就話自己會在四年內結婚，認真頂到盡。
