洪天明和女友周家蔚證實結婚，雙方父母可謂飲得杯落。資料圖片
徐子淇嫁入豪門成為幸福千億新抱，她的舊愛洪天明近日也傳出喜訊，將與女友周家蔚拉埋天窗。曾與洪天明傳緋聞的貝安琪，前晚在九龍圓方出席護膚品活動時，證實洪天明的結婚消息。
貝安琪自爆蜜運之餘，也踢爆洪天明將會結婚。
開香檳慶祝
貝安琪說：「我有同佢食過飯，佢有同我講咗話結婚，我仲同佢飲香檳慶祝。我之前都有見過個女仔，佢哋好襯，開心佢搵到個好女仔，到時我一定會去飲。」早前到德國拍片兼做手指骨手術的貝安琪，也自爆正在蜜運中，她說：「係媽咪介紹嘅，拍咗一個多月，佢係法國美國混血兒，嚟自LA ，係歌手同演員。」
另一方面，洪天明昨日接受本報記者電話訪問時，對於有指他與周家蔚結婚及二人已訂婚的傳聞，他說：「我未結婚又冇訂婚，如果結一定公開，冇咁快，結婚冇得急，今年都唔結住，我有打電話問番貝安琪點解咁講，佢話講笑啫！我冇鬧佢，或者我同佢仲有可能呢。」他又否認曾向周家蔚求婚，指二人只是好朋友。
