古城牆於14及18世紀復修，中世紀時對付海盜都係靠佢，保存至今，是加泰隆尼亞海岸最完整最有氣勢的圍城。
里安納度狄卡比奧同名模女友Bar Rafaeli 各自偷食，大家咁岩揀去西班牙游水，世界咁大，咁都撞到正。這個地中海熱情國家的吸引力，就算荷李活影星名模都抵擋唔住。
只因為，西班牙海灘樣樣都正過人！
單單以巴塞隆拿一帶的加泰隆尼亞自治區Catalonia 為例，不同城鎮海灘多到暈，唔似法國南部蔚藍海岸沙粒粗到拮肉，西班牙東北部沙灘個個水清沙幼，兼且各有特色。你想喺中世紀圍城旁邊游水？同型男索女齊齊天體日光浴？定要試試海中心泳池浸鹹水？
以巴塞為基地，搭一個鐘火車或巴士玩勻加泰隆尼亞沙灘，直頭似去酒吧蒲場，可以轉場蒲餐飽！
每隔幾呎都有身形勁fit 的比堅尼女郎結伴同曬。
Tossa de Mar 有14個沙灘，以市中心的主灘Platja Gran 最靚景。
市中心的窄街加小白屋，同希臘聖托里尼有七成似。
部分古蹟可追溯至羅馬帝國時代。
Point 1古城牆下曬太陽
球星名模人人專程飛西班牙度假，我都唔執輸，沿喺西班牙東北部加泰隆尼亞自治區的海岸線，逐個城市玩。地中海藍天白雲，沿海大片沙灘、懸崖礁石種種地利因素，巴塞附近的幾個小城都變成resort 區，好多西班牙人法國人經常去歎週末。
其中位於巴塞北面的布拉瓦海岸Costa Brava ，古城Tossa de Mar 唔只有沙灘有懸崖，崖上仲有加泰隆尼亞唯一現存的古圍城。訓喺沙灘曬太陽，望住建於12世紀嘅古城牆，景色靚過淺水灣豪宅多多聲。游水前又可以慢慢行上山參觀古蹟，坐喺山頂，望見崖邊海水冰藍清澈，真係齋睇人浮潛都心情靚晒。
行落沙灘，沙算幼唔拮腳，雖然未至於馬爾代夫的粉末狀幼沙，但在歐洲來說，絕對見得人，水質亦嗱埋歐盟藍旗證明優良。最正係景靚，人仲靚！比起蔚藍海岸有錢人度假區，以退休人士或一家大細為主，呢度多遊客更多後生仔女，仲要係蜜糖色皮膚身形fit 到漏嗰隻，個個幼帶比堅尼上場，勁養眼，灘上灘外都一片好風景呀。
前往方法
於巴塞隆拿Estacio del Nord 巴士站乘巴士，每天約廿班車，車程1小時20分鐘，單程$116。
Bar tender 黃昏後先開工，日頭？曬吓太陽拋吓樽。
遊客勁nice ，就算英文麻麻，都笑騎騎同我哋傾偈。
有理由相信，西班牙沙灘上的索女全歐洲比例最高。
1522年建成的Parochial Church ，是典型加泰隆尼亞哥德式建築，鐘樓塔上很多小窗，用來監察海岸情況對抗海盜。
Point 2型男索女集中地
Tossade Mar 隔籬的Lloret de Mar ，一樣坐擁布拉瓦海岸線，七公里長海岸線上斷斷續續的大小沙灘，同樣有歐盟藍旗，水清見底。之不過，無大型古城撐場，景點稍遜，反而有大量中平價酒店旅館進駐，吸引更多年輕backpackers 同中學生，似足我哋去大嶼山度假屋。
多後生仔，自然更有活力更好氣氛，沙灘唔少酒吧有型男表演拋樽，行幾步又見到美少女打排球，亦有人被活埋於沙堆中仲笑晒口！市中心較Tossa de Mar 大但感覺相似，有希臘式的小白屋，彩色教堂很有地方色彩，絕對值得喺巴塞搭一個鐘巴士嚟玩番日。
前往方法
於巴塞隆拿Estacio del Nord 乘巴士，每天約廿班車，車程1小時，單程$102。另每十五分鐘有巴士來往Tossa de Mar ，單程$33。
長途巴士總站
由巴塞去附近城市，其中一個巴士總站是BARCELONA Estacio del Nord ，前往Tossa de Mar 及Lloret de Mar 都喺度搭，可上
http://www.sarfa.com查閱時間表及訂票，上車前於站內買飛亦可，不過記得預留時間排隊。
地址：Ali Bei,80
度假屋就喺沙灘邊，加上西班牙夏天日長夜短，沙灘朝八晚八堆滿人。
市中心不大，單車是最常見的「市內交通」。
裝有滑梯嘅水上車仔吸引力強勁，搞到個個掛住睇。
Point 3搞笑好玩水上滑梯
由巴塞北上就係布拉瓦海岸，南下35公里，有另一個度假區Sitges ，來往巴塞火車幾分鐘一班，半個鐘就到，方便成咁，梗成為度假熱點。Sitges 有大小沙灘17個，基本上，唔同人唔同喜好都滿足得到，想趁熱鬧可以去市中心主灘，想裸曬就由小路行去被懸崖包圍的偏僻小灣。
主灘Ribera Beach 的人堆中有大天鵝、滑梯水上車，鮮黃艷紅勁搶眼！泳客三五成群租架車仔，駛到出海，就爬上滑梯滑入水，笑聲成個灘都聽到，搞到人人忍唔住租番架嚟玩。香港的船河老闆們，咪再只得香蕉船高速水泡喇，入番架啦！
前往方法
巴塞隆拿Sants 或Pg de Gracia 站乘火車至Sitges 站，車程約35分鐘，單程$30。
上網逐個灘check
加泰隆尼亞沙灘出名，仲好有規劃，各城鎮旅遊局網址都有The Beaches 一項。逐個沙灘詳細介紹︰長
度、前往方法、設施、水質證書及是否天體沙灘等等一切你要知的詳情都有，很user-friendly 。
網址：
http://www.infotossa.com 、
http://www.lloretdemar.org 、
http://www.sitgestour.com 、
http://www.barcelonaturisme.com
另外，沙灘要在水質、環境保育、管理、安全和設計各方面都達到一定水平，才會獲發歐盟藍旗。詳情：
http://www.blueflag.org
沙灘中段較隱蔽部分，所有人都係半裸或全裸。
灘上有保護環境提示，大家夠晒自律，唔見隨地垃圾，不過有狗仔喺牌邊解決。
唔鍾意黏到一身沙咩？「泳池」旁有木板你揀。
泳池好處是有一米多水深，可以過過跳水癮。
Point 4最方便海中心泳池
去完附近三個小鎮，其實巴塞都唔輸蝕！沙灘有4.5公里長，長到可以劃分成8個灘，水淺沙亦算幼，由地鐵站行十分鐘即到。大城市竟然有大型靚灘，仲竟然咁近，邊度搵？
我由沙灘一端行到另一端，足足兩個幾鐘，沙灘一個接一個，最長的Platja de la Barceloneta ，最多餐廳，灘上布滿人，搵個位訓低都難，坐低食餐海鮮最正。各灘睇落分別唔大，一直行，就會發現微妙轉變，中段其中約一百米，被一個小山丘遮擋大街視線，聚集了特別多的裸男裸女，個個自由自在狂曬，有些甚至裸住行去酒吧飲嘢，自在悠然得惹人妒忌。
近尾部Platja de Llevant 於06年加建，最遠的Zona de banys del Parc del Forum 更索性玩全新概念，「無沙沙灘」「海邊泳池」二合一，喺沙上鋪木板、岸邊建扶手、淺水處起堤壩，變成海邊的游泳池。估唔到，只係由灘頭行到灘尾，已經想點玩都有。
前往方法
乘搭地鐵L4線，可前往各沙灘。
地鐵網址：
http://www.tmb.net
有用資料
前往方法：香港沒有直航機往西班牙，多數於倫敦或巴黎等城市轉機。
時差：比香港慢六小時。
貨幣：歐羅，兌換率約為?=HK$11.8（匯率浮動，文中價錢以此計算）。
簽證：持特區護照或BNO 均不用簽證。
旅遊資料：
http://www.catalunyatourism.com
住宿推介：想玩勻幾個城市又唔想日日搬酒店咁煩，巴塞勝在有大量apartment 出租，以我住的MH Apartments ，八百呎兩房一廳可住六人，都只係一千左右一晚，抵過住酒店好多！（
http://www.mhapartments.com）
