實金冇息收，由投資角度睇並唔化算。 資料圖片
溫敏妮
敏妮Talk
黃金以前係用嚟對抗通脹，但時至今日，黃金反而被視為對抗弱美元嘅工具，港元同美元掛鉤，換言之，黃金亦可以用嚟對抗弱港元。而家美元反彈，所以黃金就跌。
噚日商品指數大跌，如果沽咗黃金白銀嘅朋友就賺到笑。前排有隻黃金交易所買賣基金（ETF ）喺香港上市，敏妮睇過本認購文件，發覺唔係好吸引，但每樣產品留得喺市場，即係有捧場客，一定有佢嘅優點。
黃金ETF 嘅優點就係可睇淡、買跌，可惜香港暫時只得一隻黃金ETF 上市，仲未有沽嘅產品，其實喺外國已有long 同short 嘅黃金ETF 掛牌，如果碰正噚日咁嘅情況，就贏錢。
外國同類ETF 玩法多
喺香港投資黃金不外乎買實金、開紙黃金戶口，同埋買黃金基金，至於新產品黃金ETF ，原理只係大家夾錢買黃金，然後按「科水」比例分金。由於夾錢買金同分金呢啲雜務有個基金經理幫你搞，要畀服務費，所以金價升，你賺錢之餘要分啲畀基金經理，仲有就係買黃金ETF 同買金一樣冇息收。不過，由於黃金ETF 玩法同股票一樣，所以可以做孖展。
咁岩有位讀者留言喺敏妮blog ，問買呢隻黃金ETF 作長線投資，同開紙黃金戶口邊種好啲？喺現時香港只係得一隻黃金ETF 可揀嘅情況下，如睇黃金升，開紙黃金戶口較實際。不過敏妮覺得黃金唔適合作長線投資。
冇息收純粹博升值
雖然敏妮曾經講過，有個舊同學嘅爸爸，每年農曆新年都會以金幣封利是畀佢，好值得為人父母嘅朋友參考，等小朋友大個時見到啲金幣，就感受到父母對佢嘅關懷。不過，從投資角度睇，儲黃金並唔化算，因為冇息收，純粹博升值，咁點解唔揸收息股，收息之餘再博升值。
