江若琳話為了今次新書簽名會緊張到失眠，但知道fans 數目最多後，立即生猛番，更興奮表示：「我有衝動成立埋fans club 。」
一年一度書展又開鑼，亦是一班偶像搲銀的好時機，今年吸金大軍有江若琳、傅穎、賈曉晨、Hotcha 、I Love YouBoyz 等。在首日簽名會上，江若琳氣勢最強，68元的新書賣大包，送書簽又送潤膚露，難怪吸引近400名fans 撐場搶簽名。
fans 嗌破喉嚨狂呼江若琳，明搶當時在旁舉行新書簽名會的倪匡和撐場老死蔡瀾的鋒頭。事後記者問到蔡瀾會否睇江若琳的書，他說：「佢睇我本書先岩！」暗指她未夠班出書。
一連七日的書展周三（23日）正式揭幕，出席首日簽名會的有江若琳、鄧麗欣（Stephy ）、I Love You Boyz 、葉劉淑儀等。論人氣由江若琳勝出，簽名會開始前一小時已有200多名fans 等候，令只得百多名讀者排隊的倪匡被比下去。
近下午四時，蔡瀾和議員陳淑莊突然殺到明撐老友倪匡，隨即成為傳媒焦點，可惜鋒頭只是曇花一現。不久江若琳在多名工作人員陪同下現身簽名會，在場近400名fans 不停吶喊，大部分記者亦轉軚改而狂閃江若琳。蔡瀾見狀，亦忍唔住要行近兩步偷望隔籬，看誰有如此本事。神枱級作家被嚫妹搶盡鋒頭，蔡瀾當然冇癮，事後記者問到他，他說：「搶鋒頭係冇問題，我哋都會繼續簽名嘅。（你會唔會睇江若琳本書？）我睇佢？佢睇我本書先岩！」
之後記者將蔡瀾番話轉述給江若琳聽，她聽後愕然，「我哋啲後輩一定要向前輩學習，我都有睇蔡生倪生啲書，佢教咗我好多做人哲理。我唔係想做咩才女，出書都係想同fans 分享吓！」答得大方得體。
行近偷
蔡瀾、倪匡和陳淑莊議員本來企定定任影（右下圖），但江若琳殺到後，傳媒一窩蜂轉軚，蔡瀾好奇，忍唔住行近偷
一下誰人踩場。
400fans 逼爆
fans 們慌死偶像江若琳唔夠聲勢，排定隊，舉埋牌，嗌晒名，難怪其新書簽名會最旺場，幾乎逼爆鐵馬。
又送又攬
68蚊唔止有書，仲有親筆簽名，兼有潤膚露（右下圖），更有偶像主動送個熱情擁抱，抵到爛呀。
葉劉敗陣
除了江若琳揮低前輩外，I Love You Boyz 亦將葉劉淑儀的聲勢打得落花流水，fans 數目比葉太多出三倍。自從不用捍衛掃把頭後，葉太性格亦變得溫和，對於書展敗陣，她顯得十分大方，她對本刊記者說：「每一個地方都有唔同文化，社會有不同層次，我絕對接納偶像出書嘅風氣，有啲書真係會有啲嘢講。（自從你美國回流後都多咗fans ？）係多咗一班大學生fans ，我都有喺facebook 通知佢哋。（有冇睇過I Love You Boyz 嘅作品？）冇睇過，不過佢哋真係有好多fans ，依家我真係要睇下啲流行文化，或者搵佢哋幫我宣傳下。」
民主式簽名
葉太有諮詢意見習慣，她對每位fans 都問：「你想我點寫？」絕對以民為先。
fans 舉牌撐
相多字少是偶像作品的風格，今次I Love You Boyz 也不例外，還附送DVD ，吸引200名fans 合法聚集，壓倒葉太。
友誼之手
葉太和I Love You Boyz 在無政治條件下，交換對方簽名新書，葉太還向他們說：「祝你哋愈來愈成功！」
為愛犬Cash 出書的鄺美雲，可能新書內容不夠普及，加上港人未必會咁揮霍喺寵物身上，所以排隊嗱簽名嘅fans 少之又少，鐵欄位全「吉」（右下圖）。
Stephy 出書？非也！今次只為電影《內衣少女》原著小說簽名，不過fans 數目仍僅次於江若琳。
