陳法拉去年豬籠入水，但近月因負面新聞而潛晒水，廣告商紛紛轉軚搵「咪神」徐淑敏，被人㩒住嚟打的她唯有減價自救。
姣上位的陳法拉，去年試過月搵五十萬，接騷接到手軟，搵錢指數成為新紮姐仔之冠。不過，陳法拉人紅變臉，對內拍戲扮大牌，對外亦化身黑面神，人緣度大跌watt 。
形象轉差，廣告商看風駛
，紛紛轉軚搵肯搏肯露兼且未寸上面的徐淑敏及「長腳蟹」呂慧儀頂替變臉法拉，為挽頹勢，陳法拉出騷價由去年的三至四萬急減至兩萬，劈價搶客！
陳法拉因態度囂張得罪人多，上週五出席活動時亦無記者騷佢；不過為保飯碗，見到廣告商即笑到見牙唔見眼，用姣功
爆對方。
擺阿姐款
新一代「姣精」陳法拉去年憑《溏心風暴》及《師奶兵團》人氣急升，加上噴血身材迷暈全港電車男，令她成為廣告界新寵，短短一個月接十幾廿個商場騷，收入拍得住一線花旦廖碧兒及佘詩曼。
唔止識
廣告商，陳法拉亦深得總經理陳志雲厚愛，入行唔夠三年，已在年尾的台慶頒獎禮奪得「最佳女配角」，令死敵廖碧兒飲恨。
可惜人紅生驕，陳法拉自恃有高層撐腰，拍劇黑面擺款，惹來工作拍檔群起非議；即使對外，她一樣勁擺阿姐款，結果遭記者群起杯葛！
上月尾陳法拉及大細契等一眾演員為《溏心風暴2家好月圓》拍攝擺酒戲份，寸爆的陳黑面兼匿入房唔見人，終辣㷫記者而遭杯葛。
陳法拉多次被偷影到同Neway 太子爺密會，因而痛恨狗仔隊，近月更玩反偷拍，影完仲非常得戚話要將相片放上網任人睇，行為令人反感。
呂慧儀近日受電視劇帶挈而人氣急升，「長腳蟹」形象深入民心，加上只收萬五蚊出騷價，認真抵用。
徐淑敏雖然唔多劇拍，但騷價二萬，肯搏肯露，態度又好，深得廣告商及傳媒歡迎，近月接騷接到手軟。
玩寸記者
早前，《溏心2》拍婚宴戲搞探班，全部演員做齊訪問，唯獨陳法拉經三催四請依然未肯蒲頭見人，在場記者正想拉隊走人之際，她才施施然步出。鏡頭前後兩個樣，對住記者全程黑面，只有影相對住鏡頭才見招牌笑容，雙面人。
上週五（六月廿七日），陳法拉出席店鋪開幕時忽然轉性，笑足全程；全因形象插水的她遭廣告商唾棄，商場騷工作近乎零。
「之前有個手機品牌活動，原本想搵陳法拉做嘅，但廣告商見佢人氣大不如前，咪臨時換咗用Suki （徐淑敏）囉，而家出面嘅人都寧願用Suki 同呂慧儀，貪佢哋平靚正喎！」知情者透露。
米飯班主個個轉軚，為保財路陳法拉唯有使出絕招劈價搶客，騷價由高峰期三、四萬，減至出道初期的萬五至二萬，雖然半價，但近兩個月仍只接得兩三個騷，僅是去年同期的十分一。
對於商場騷大減，陳法拉經理人Abby 解釋拍劇之故：「法拉呢幾個月忙緊拍《溏心2》先無期接騷啫，最近岩岩拍完，會幫佢接番多嘅搵錢job 。」水能載舟，亦能覆舟，陳法拉未紅先驕，自食其果。
縮水九成
去年多得《溏心風暴》帶挈，陳法拉曾有一個月接廿四個商場騷輝煌紀錄，風頭一時無兩，自從負面新聞不絕，近半年只接得兩個騷，收入插水！
07年 5至6月
金至尊剪綵
AEROSOLES 鞋活動
NOELCHU 婚妙騷
雀巢美肌活動
Mi-tu Fashion
Bon Bon 內衣騷
yesstyle.com 等共24個
平均2萬
合共：48萬
08年 5至6月
Joy & Peace 活動 2萬
Loft-B Studio 剪綵 2萬
合共：4萬
