髮型師D.Y 入行5年，除了吳建豪、安志杰、黃浩然及陳敏之外，林
也是其客仔。
做藝人真係正，有髮型贊助，年中慳番唔少之餘，整頭髮亦有唔少優惠，好似無線姐仔陳敏之，每個星期都會去銅鑼灣的Hair Culture ，焗油兼修吓個頭，唔怪得佢個個月染髮都冇有怕啦。
Hair Culture 99年開幕，贊助不少藝人，客仔有周潤發、鄭秀文、許志安、楊千嬅、舒淇及衛蘭等，粒粒大星。明星鍾意喺度整頭髮，最重要係因為有獨立房間，私隱度勁高。除了Hair Culture ，HAiR 及Salonide ，亦是名星經常幫襯的髮型屋。
before
洗頭座位亦分兩邊，熟客過邊座位較為闊落，陳敏之讚這里的洗頭師傅手勢一流，拍得住專業按摩師。
除了拍劇拍到天昏地暗外，陳敏之都會定時去髮型屋焗油，她說︰「由於工作關係，個個月都要染髮，為咗保住把頭髮油潤啲，如果有時間都會個個禮拜嚟焗油，同髮型師D.Y 合作咗兩年幾，覺得好夾。呢度環境舒適，加上有獨立房間，有時出騷前帶埋化妝師嚟，可以一邊整頭，一邊化妝，慳番唔少時間。
「近年染髮染得密，D.Y 介紹咗隻日本出嘅Nigelle AX 滋潤洗頭水俾我，不但可保濕，令頭髮染完冇咁旱，轉咗呢隻牌子嘅護髮系列，仲甩少咗頭髮，髮尾亦唔會叉，所以我會keep 住用。」
after
吹完頭，陳敏之的髮型層次感明顯比之前大增，即時醒神好多。
陳敏之整頭當日，楊千嬅亦在此染髮，但由於房間爆滿，千嬅惟有被安排在外面的隱蔽位置整頭。
Hair Culture 的中環分店，面積約千二呎，有四間獨立房，每間約60呎左右，由於經常full booking ，所以最好book 定，費用另加二百。
陳敏之推介日本品牌Nigelle AX 護髮系列，洗頭水價值180元，treatment 價值340元。此外，她說店內還有一隻髮泥十分好用，就是135元的Osis+Miss Up （紅盒），set 頭效果較持久。
髮型tips
今年興短髮、微鬈，顏色興深啡偏綠同黑色，要多層次，多highlight 。黑色短髮較易handle 。
Hair Culture
地址：中環中航大廈7樓
電話：23178886
D.Y 收費：洗剪吹$780；電髮$600-$1,800；染髮$500-$1,200
07年3月，Sammi 為新歌〈愛情萬歲〉拍MV ，Billy 為她由美國訂了個假髮，約40蚊港幣，勁超值。
Billy 最新力作，是幫Sammi 與何韻詩新歌MV 〈劍雪〉，作女戰士造型。
鎮店髮型師 Sammi 搵Billy
Sammi亦是Hair Culture 多年客仔，而她幫襯的是店內老闆Billy Choi 。Sammi 每次拍MV 、影唱片封套及開演唱會，都由Billy 親自操刀，有時Billy 更會跟埋Sammi出trip 及到拍攝場地為她造髮。Billy 是店內首席髮型創作總監，單單剪髮都要1,600元。
明星客仔：周潤發、舒淇、何超儀及許志安等。
《壹週刊》圖片
千嬅搵Ritz
除了Billy ，Hair Culture 還有不少星級髮型師，如千嬅的御用髮型師Ritz ，去年演唱會亦由他操刀。
明星客仔：劉嘉玲、陳慧嫻及裕美等。
《蘋果日報》圖片
衛蘭搵Tavin
衛蘭出道開始，就幫襯Hair Culture ，無論是唱片封套及演唱會髮型，都由Tavin 負責。
明星客仔：衛詩
Kelly 鍾情長髮，Geroge 話：「因為佢初出道嘅短髮fans 唔多受，所以佢一直都冇諗過剪短。」
呢個髮型上的金片，要一塊塊黐上去，難度甚高。
陳慧琳婚禮髮型有贊助
在演唱會中宣布結婚的Kelly ，忙完演唱會後，便開始忙十月婚禮，而與她合作了四年的髮型師George Shum ，更拍心口包辦其婚禮的髮型。George 表示︰「Kelly依家仲未揀到婚紗，所以暫時未有構思，不過，做騷佢咩頭都整過，所以話結婚反而會高貴啲、簡單啲為主。Kelly 同佢姊妹嘅頭髮我會搞掂，當然包括埋佢嘅經理人鍾珍啦。呢個係我送俾佢最大嘅結婚禮物。」
自從與Kelly 合作後，George 已甚少為其他藝人整頭︰「Kelly 本身工作已經好多，加上出trip ，淨係做佢一個都好full 。同佢好易溝通，佢好清晰自己要啲乜，唔鍾意啲古靈精怪嘢。佢好錫把頭髮，一得閒就落嚟做treatment ，就算係忙，都會用我介紹嘅水分mask 每星期焗兩次，做演唱會時啲複雜嘅髮型，都係用假髮，咁起碼冇咁傷真頭髮。
「做藝人嘅髮型師，最大挑戰係喺緊逼嘅時間做最靚嘅髮型。好似今次演唱會，佢跳埃及舞過part ，得過幾十秒，但頭飾要一條條黐上去，但又要確保佢跳勁舞時唔會甩，呢啲好考功夫。」
1月份Kelly 上昆明出席《M 大會》時，因寄失行李，被迫穿casual wear 上台，而Geroge 冇晒整頭髮工具，惟有找來十幾隻黑色髮夾同Kelly set 過簡單嘅髻，但都過到骨。
御用髮型師George 指Kelly 好少坐房，但房內有電腦，設計亦十分特別，有水晶燈及手繪牆壁。獨立房有三間，每間設計都唔同，訂房要另收費3百元。
HAiR 贊助唔少藝人，黎姿、汪阿姐、胡杏兒、黃宗澤都是其常客。拍攝當日，黃長興及長發兩兄弟亦在此整頭髮。
Kelly 最近轉了Tender Feel 的洗頭水及護髮素，分別是120元、250元，而LAZULITE 的treatment 則要1,000元，專俾漂染後的頭髮作保濕。
HAiR 裝修高貴，華麗的水晶燈襯上紅地氈，有點懷舊氣息！
髮型tips
今季冇話興咩長度，但最緊要係有厚度，solf 得嚟唔碎，輕得嚟又要厚，可以加番啲鬈度，配襯唔同場合。
HAiR
地址：銅鑼灣波斯富街99號利舞台廣場10樓
電話：25259555
George shum 洗剪吹$940；電髮$600-2,000；染髮$650-1,200
Salonide 店內十分寬敞，每個位都獨立，空間感很大。
5月8日下午，陳法拉匆匆在Salonide 逗留45分鐘便離去。原來每次她都來去匆匆，故修髮及焗油都要分秒必爭。
獨立房間有兩個，房內還有腳部按摩器，供客人使用，book 房要加120元。
陳法拉要快靚正
陳法拉平日會到時代廣場9樓的Salonide 整頭及修甲，其御用髮型師阿Ling 話︰「法拉次次嚟好趕，有時半個鐘多啲就要搞掂，所以同佢整頭髮要快、靚、正。佢好多時嚟係修髮腳同焗油。佢都係鍾意長頭髮，變化多啲性感啲，可以打散或者set 起，冇咁悶。
「陳法拉唔係咁鍾意坐房，除非修腳甲或者係設計劇集嘅造型要保密，否則平時佢都係坐普通位，佢話坐出面多啲嘢睇喎！不過都有客一定要坐房，好似鞏俐，佢就次次嚟都要book 房。咁佢係國際巨星，如果俾記者影到都好珍貴，所以佢會要求高啲私隱度。
「同明星整過咁多次頭，最難忘都係05年同張燊悅設計電影《魔幻賭船》嘅造型，因為要事先買個地拖咁嘅假髮，然後再修剪，不過效果幾好，電影公司都好滿意，不過佢嫁咗就少嚟咗。其實我哋定時會入定一啲假髮，尤其係一啲誇張嘅顏色如粉紅色及銀色，方便藝人影相，今年都好流行螢光色。」
陳法拉常用的洗頭水，是KERASTASE 的Volumactive ，可以令髮質豐厚啲。洗頭水220元、護髮素320元，至於mask ，則750元。
洗頭的座椅之間有屏風，增加私隱度。
陳法拉偏愛essie 嘅素色甲油，而且鍾情留短甲，從來不gel 甲。
張燊悅在《魔》的髮型，是阿Ling 用地拖頭一般的假髮剪出來，但睇落完全唔似假髮。
阿Ling 話：「有時法拉出trip ，我跟唔到去，會為佢準備一set 整頭用具，最實用就係呢個袖珍風筒，風力有髮型屋大風筒咁勁，但size 就同普通風筒一樣。價值460元。」
髮型tips
今年興染深啡色，但highlight 就唔再玩強烈對比，反而玩層次，即係如啡色嘅tone 深淺由1至9度，咁就唔會揀1同9度，反而係3、6、9度。髮型講求鬆同厚，唔可以薄同碎。多啲線條感，髮尾要剪成直。
Salonide
地址：銅鑼灣時代廣場9樓901
電話：31028008
阿Ling 收費：洗剪吹$540；電髮$700-$1,480；染髮$520-$1,080
